ದಿ| ಭಾಸ್ಕರ ಮಂಜೇಶ್ವರ ಬೋಕ ಶ್ರೀಮತಿ ಗುಲಾಬಿ ಮಾರಿಪಳ್ಳ ಮುಕ್ಲೆನ ಮಗೆ ಚೇತನ್ ಎಂ ರೆನ ಮದಿಮೆ ಮೊಡಂತ್ಯಾರ್ ಮಾಲಾಡಿ ಆನಂದ ಮೂಲ್ಯ ಬೊಕ ಸುಶೀಲ ಮುಕ್ಲೆನ ಮಗಲ್ ಶೋಭಾ ನ ಒಟ್ಟಿಗೆ ಜೂನು5 ತಾರೀಕ್‌ಗ್ ನಡತ್ಂಡ್. 

   ಇನಿ ಕೋಡೆ ಮದಿಮೆದ ದುಂಬುನಾನಿದ ಮದ್ರೆಂಗಿ ಲೇಸ್‌ದ ಅಬ್ಬರದ ಡೀಜೆದ ಕೆಬಿ ಕೀಲುನ,ತಿಗಲೆ ಎಡ್ಪುನ ಸ್ವರ,ಗಂಗಸರನ್ ಮೂಂಕುಮುಟ್ಟ ಪರ್ದ್ ನಲಿಪುನ ನಲಿಕೆದ ಬಿರ್ದ್ ಮೂಲಿಜ್ಯಂಡ್. ಜಾಲನಡುಟು ಮದಿಮಯನ್ ಕುಲ್ಲಾದ್ ಮಂಜಲ್ ಪೂಜಿದ್ ಬೊಕ್ಕ ತೆತ್ತಿನ್ಲಾ ಅಯನ ತರೆಕ್ ದರ್ತ್‌ದ್ ಪುರಲ್ ಲಕ್ಕಾವುನ ಮರ್ಲ್‌ಗೊಬ್ಬು ಮೂಲಿಜ್ಯಂಡ್.ಹಿಂದು ಸಂಸ್ಕೃತಿ ದ ಪ್ರಕಾರ ದೇವೆರೆ ಪೂಜೆ,ಗ್ರಾಮ ದೇವೆರ್,ಗುರು ಹಿರಿಯೆರೆನ ನೆನವರಿಕೆ ಮಂತೊಂದು ಇಲ್ಲದ ಉಲಯಿ ಜಾವಡಿಡ್ ಮಣೆದೀದ್ ಮದಿಮಯನ್ ಕುಲ್ಲಾದ್ ಹಿರಿಯಕ್ಲು ಪೇರ್ ಪೂಜೂನ ಪಿರಾಕ್ದ ಪೊರ್ಲು ಮೂಲು ತೂಯೆರೆ ತಿಕ್ಕ್ಂಡ್. ಮದಿಮೆದಾನಿ ಕಾಂಡೆ ಮದಿಮೆದ ದೊಂಪಗ್ ಪೊಗ್ಗೆರೆದುಂಬು ಮೂರ್ತದ ಕಂಬ ಏರಾದ್ ಮದಿಮಯನ್ ಕಾರ್ ದೆಕ್ಕ್‌ದ್ ಉಲಯಿಪೊಗ್ಗುನ ಕ್ರಮಲಾ ಬಾರಿ ಪೊರ್ಲಾತ್ಂಡ್.ಅಂಚೆನೆ ಎದುರೈಕೊನುನ,ಕುರ್ದಿ ತೊರಪುನ,ಆರತಿ ಮನ್ಪುನ,ಧಾರೆ ಏರಾವುನ,ದೊಂಪ ಜಪ್ಪುನ,ಸಿರ್ದೇಸಿ ಕಟ್ಟುನ,ಪೊಣ್ಣೊಚ್ಚಿದ್ ಕೊರ್ಪುನ,ನುಪ್ಪು ಬಲಸಾವುನ

Advertisement

ಮಾತಾ ಕ್ರಮನ್‌ಲಾ ಹಿರಿಯೆರಾಯಿನ ಅಡ್ಯಾರ್ ಆನಂದ ಕುಲಾಲ್ ಮಿತ್ತಯಿಲ್ಲ್ ಬೊಕ ಮಾಲಾಡಿ ಆನಂದ ಮೂಲ್ಯೆರ್ ದುಂಬುಂತ್ತುದು ಮಂತೆರ್.

   ತುಲುನಾಡ್‌ಡ್ ಅವ್ವೇತೋ ಜಾತಿದ ತುಳುವೆರ್ ಉಲ್ಲೆರ್,ಪ್ರತೀ ಒಂಜಿ ಸಮಾಜಡ್ಲಾ ಅಕ್ಲೆನವೇ ಆಯಿನ ಕಟ್ಟ್ ಕಟ್ಲೆ,ಆಚಾರ ಇಚಾರೊಲು ಉಂಡು.ಪುಟ್ಟುರ್ದು ಸೈವರಮುಟ್ಟದ ನರಮಾನಿ ಬದ್ಕ್‌ಡ್ ಪ್ರತೀಯೊಂಜಿ ಪಜ್ಜೆಡ್ಲಾ ನಮ್ಮ ಸಂಸ್ಕೃತಿ ಸಂಪ್ರದಾಯೊದ ಆಚರಣೆಲು ಉಲ್ಲ. ಒರು ಪಗರುನ ಕಾಲದ ಒಯ್ಲ್‌ಗ್ ತಿಕಲೊಂದು ನಮ್ಮ ಸಂಪ್ರದಾಯನ್ ಅರಿದ್‌ಪೋಯೆರೆ ಬುಡಂದೆ ಒಂತೆನಾಂಡಲಾ ಒರಿಪುನ ಪ್ರಯತ್ನ ಇಂಚ ಆವೊಂದುಂಡು ಪನ್ನಗ ಉಡಲ್‌ಗ್ ಸಂತೊಸು ಆಪುಂಡು. ಪರತಿರಿನ್ ಒರಿಪುನ ಪ್ರಯತ್ನಡ್ ತೊಡಗೊಂದಿನ ಹಿರಿಯೆರಾಯಿ ಅಡ್ಯಾರ್ ಆನಂದ ಕುಲಾಲ್ ಮಿತ್ತಯಿಲ್ಲ್,ಬೊಕ ಮಾಲಾಡಿ ಆನಂದ ಮೂಲ್ಯೆರೆಗ್ಲಾ ಉಡಲ್‌ದಿಂಜಿನ ಸೊಲ್ಮೆಲೆನ್ ಸಂದಾವೊಂದು ನನಲಾತ್ ಇಂಚಿನ ಮದಿಮೆಲು ನಿಕ್ಲೆನ ಗುರ್ಕರ್ಮೆಡ್ ನಡಪಡ್ಂದ್ ಬಯಕುವೆ.

  ಗಂಗಸರದ ಪಾರ್ಟಿ ಮಂತ್‌ದ್ ಬತ್ತಿ ಮದಿಮಲೆನ ಬಂಗಾರ್ ಅಡವುದೀದ್ ಸಾಲ ಬೂಟುನ ಜವನೆರೆ ನಡುಟು ಚೇತನ್‌ನಂಚಿನ ಜವನೆರೆನ ಆದರ್ಶ ನನದ ಜವನೆರೆಗ್ ಸಾದಿಬೊಲ್ಪು ಆವಡ್. ತುಲುವನಾಡ್‌ದ ತುಲುವ ಸಂಸ್ಕೃತಿ ಸೂರ್ಯ ಚಂದ್ರೆರಿತ್ತಿನೇಟ ಒರಿಪುಲೆಕ ಆವಡ್ಂದ್ ಬಯಕೊಂದು ಪೊಸ ಜೋಡಿಗ್ ಉಡಲ್ದಿಂಜಿನ ಎಡ್ಡೆಪ್ಪುಲು.