ಅಂದ್ ಕೇನ್ನಗನೇ ಆಚಿರ ಆಪುಂಡು,ಎಲಿ ಪನ್ನಗನೇ ಮೋನೆ ಪೀಂಟಾವುನ ನಂಕ್ ಎಲಿಕ್ಲೆಗ್ಲಾ ಒಂಜಿ ದಿನವುಂಡೂಂದು ಕೇನ್ನಗ ಆಚಿರ ಆಪುನವು ಸಾಜ.ಈ ಪಸಂತ್ರೊಡು ಅವ್ವೇತೋ ಬಗೆತ ಜೂವ ಜಂತುಲು ಉಪ್ಪುನಗ ಅಯಿತ ಒಟ್ಟಿಗೆ ಉಪ್ಪುನ ಎಲಿಲಾ ಒಂಜಿ.ಬುದ್ದಿವಂತೆ ನರಮಾನಿನ ಓರೆ ನೋಟಗ್ ಬೂರ್ದು ಜೂವ ಬುಡ್ಪುನ ಎಲಿಕುಲು ಮನ್ಪುನ ಬೇಲೆ ನರಮಾನಿಗ್ ಉಪದ್ರ ಕೊರ್ಪುನನೇ ಆದುಂಡು.ಕಂಡಡ್ ಕುರಲ್ ತಜಪುನಿ,ಕೆರೆಂಗ್,ಮರಕೆರೆಂಗ್,ಚೂರ್ಣಕಂಡೆ,ರೆಚ್ಚೆವುದಕಂಡೆ ನೆನ್ ಮಾತು ಪೆರೆದ್ ತಿನ್ಪುನಿ, ತಾರೆರ್ದ್,ಬೊಂಡ,ಬನ್ನಂಗಾಯಿ ಒಟ್ಟೆ ಮಂತ್ ತಿನ್ಪುನಿ,ತೌತೆ ಮನೊಲಿ,ಪೀರೆ ಇಂಚ ನರಮಾನಿ ತಿನ್ಪುನ ಮಾತಾ ಸೊತ್ತುನ್ಲಾ ಎಲಿ ಬಾಯಿಪಾಡುಂಡು ಪಂಡ ಅವು ನಂಕ್ ತೊಂದರೆ ಕೊರೊಡೂಂದು ಅತ್ತ್,ಆಯಿತ ಬಂಜಿದಿಂಜಾಯೆರೆಗಾದ್.
ಕುಕ್ಕು,ಪೆಲಕಾಯಿ,ಪರ್ಂದ್,ಪೆರಂಗಾಯಿ,ಚುಕ್ಕು ಇಂಚ ನಮ ತಿನ್ಪುನ ಪೂರಾ ಫಲವಸ್ತುಲೆನ್ಲಾ ಎಲಿ ತಿನ್ಪುಂಡು.ಅಂಚಾದೇ ಲೋಕೊಡು ಇತ್ತಿನಮಾತಾ ಎಂಕೇ ಪನ್ಪುನ ನರಮಾನಿಗ್ ಎಲಿನ್ ತೂಂಡ ಪಗೆ.
ಎಲಿ ಮಣ್ಣ್ಡ್ ಮಾಟೆಮಂತ್ ಇಲ್ಲ್ ಮಂತೊನುನ ಜೂವ.ಕಲ್ಲ್ ಮಣ್ಣ್ ಡ್ ಒಲ್ತು ಓಡೆಲಾ ಮಾಟೆ ಮನ್ಪುನ ತೂನಗ ನರಮಾನಿ ಸುರಂಗ ಮಾರ್ಗ ಮನ್ಪೆರೆ ಎಲಿನ್ ತೂದೇ ಕಲ್ತಿನಾದುಪ್ಪುವಾಂದ್ ಸೋಧ್ಯ ಆಪುಂಡು.ಮಾಟೆ ಕುರೆಯೆರೆ ಸುರು ಮಂತ್ಂಡ ವಾ ಗೋಡೆಲಾ ಲೆಕ್ಕೊಗಿಜ್ಜಿ.ಇಲ್ಲದ ಊಲಯಿ ಬರೊಡಾಂಡ ಗೋಡೆ ಕುರೆದೇ ಬರ್ಪುನ ಎಲಿ ಇಲ್ಲದುಲಯಿ ಬತ್ತಿ ಬೊಕ್ಕ ಮನ್ಪುನ ಕಿತಪತಿಯೇ ಬೇತೆ.ಕುಂಟುದ ಅಟ್ಟಿನೆ ಕತ್ತೆರ್ದ್ ಪಾಡುಂಡು,ಸಾಮಾನ್ ದ ಡಬ್ಬಿ,ಮರತ ಪೆಟ್ಟಿಗೆ,ಬೂಕುದ ಅಟ್ಟಿ,ಜೋಕುಲೆನ ಚೀಲ,ಗೊಬ್ಬುನ ಸಾಮಾನ್ ಒಂಜೆನ್ಲಾ ಬುಡಾಂದೆ ತಜಪುಂಡು.ಕಿದೆಕ್ ಪೊಗ್ಗುಂಡ ಅಟ್ಟೊಡಿತ್ತಿನ ಬಯಿನ್ ಪೊರ್ಲು ತಜತ್ಪಾಡುಂಡು.ಮಾಡ್ಗ್ ಪೋಂಡ ದಂಬೆ ಓಡುದ ಸಂದ್ಡೇ ಬುಡರ ಕುಲ್ಲುಂಡು,ಇತ್ತಿನ ಕುಂಟುದ ಚೂರು,ಸಾಬೂನು,ಒಲಿ ಮಾತೆನ್ಲಾ ಕೊನೊದು ಓಡುದ ಸಂದ್ಡ್ ದೀಪುನ ಎಲಿ ಪಗೆಲ್ ಮನಿಪಂದೆ ಕುಲ್ಲುದು ಕತ್ತಲೇನಗ ಕಿಚಿ ಕಿಚಿ ಮಂತೊಂದು ಬಲಿಪೆರೆ ಸುರುಮನ್ಪುಂಡು.ಒರವೊರ ರಾತ್ರೆಡ್ ಅಟ್ಟೊಡು ಅಯಿತ ಗಾಡತೂಂಡ ಮಾಡೇ ಬೂರುಂಡಾಂದ್ ತೋಜುಂಡು. ಇಂಚಿತ್ತಿ ಎಲಿನ್ ಪತ್ತೆರೆ ನರಮಾನಿ ಎಲಿ ಗೂಡು ದೀಪುನ,ಎಲಿಪಾಸನ ದೀಪುನ ಬೇಲೆನ್ ಮಂತೊಂದೇ ಉಪ್ಪುವೆ.ಆಂಡಲಾ ಎಲಿತ ಸಂತನನ್ ಮುತ್ತಾಯೆರೆ ನರಮಾನಿರ್ದ್ ಸಾಧ್ಯ ಇಜ್ಜೀಂದ್ ತೋಜುಂಡು.ದಾಯೆಪಂಡ ಈ ಪಸಂತ್ರೊದ ತೂಕೊನು ಸಮ ದೀಯೆರೆಂದೇ ಎಲಿನ್ ಸೃಷ್ಟಿ ಆದುಪ್ಪೊಡು. ಅವ್ವೇತೋ ಉಚ್ಚು,ಗಿಡಿ,ನವಿಲ್ ಗ್ ಆವಾರ ಆದ್ ಒದಗುನ ಎಲಿನ್ ಏತೋ ಬಗೆದ ವಿಜ್ಞಾನದ ಪರೀಕ್ಷೆ ಲೆಗ್ ಗಲಸುವೆರ್. ಪಾಕ ಬಗೆತ ಮರ್ದ್ ನಾಡ್ಪತ್ತ್ನಗ ಸುರೂ ಎಲಿತ ಮಿತ್ತೇ ಪ್ರಯೋಗ ಮನ್ಪುವೆರ್ಗೆ!!,
ಎಲಿನ್ ಪಂಡ್ದ್ ಪ್ಲೇಗ್, ಎಲಿ ಜ್ವರ ಇಂಚಿನ ಜೂವಸಂಗಡದ ಸೀಕ್ ಬರ್ಪುಂಡು ಪನೊಂದು ಎಲಿನ್ ಕೆರಿಯೆರೆ ಕೊಡಿ ಕಾರ್ಡ್ ಉಂತಿನ ನರಮಾನಿ ತಾನೇ ಎಲಿಕ್ಲೆಗ್ ಬೋಡಾಯಿನ ತೆನಸ್ನ್ ಸಾದಿ ಬೀದಿ ಪಾಡೊಂದುಲ್ಲೆ ಪನ್ಪುನ ಅರ್ಥ ಮಂತೊನುಜೆ,ಮಲ್ಲ ಮಲ್ಲ
ಪೇಂಟೆಡ್ ಅವುಲವುಲು ರಾಶಿ ಬೂರುನ ಕಜವು ಎಲಿಕ್ಲೆಗ್ ಸುಲಬೊಡು ಬಂಜಿದಿಂಜಾವೊಂದುಲ್ಲ.ಗಟರ್ಗ್ ಮುಚ್ಚಿನ ಕಲ್ಲ್ದ ಸಂದ್ರ್ದ್ ಪಿದಡುನ ಎಲಿಕುಲು ಪೇಂಟೆಡ್ ವಾವೊಂಜಿ ಪೋಡಿಗೆಲಾ ಇಜ್ಯಂದೆ ಇರ್ಲ್ ಪಗೆಲ್ ಜನಕ್ಲೆನ ಕಾರ ಇಡೆಟ್ ಬಲಿಪುನ ತೂನಗ ಆಚಿರ,ಏಸಿಗೆ ಆಪುಂಡತ್ತಂದೆ ನಮ್ಮ ತಪ್ಪು ನಮಕ್ ತೋಜುಜಿ.
ಕನಕ್ದ ಅಟ್ಟಿದ ಇಡೆಟ್,ಬೈತ ಮುಟ್ಟೆಡ್,ಅಟ್ಟೊಡು,ದಂಬೆದ ಸಂದ್ಡ್,ಮಾಟೆಡ್,ಬೇರ್ದ ಸಂದ್ಡ್,ಬೆಜಕ್ರೆದ ಮುಟ್ಟೆಡ್ ಇಂಚ ಓಲಾಂಡಲಾ ಎಡ್ಡೆ ಬಂದೊಸ್ತುದ ಜಾಗೆಡ್ ಕಿನ್ನಿಲೆನ್ ದೀದ್ ಜೋಕೆಡ್ ಸಾಂಕುನ ಎಲಿಕುಲು ಒರ ಏಳೆನ್ಮ ಕಿನ್ನಿಲೆನ್ ದೀಪ, ಕಕ್ಕೆ,ಕೇರಿದ ಕಣ್ಣ್ಗ್ ಬೂರಂದಿಲೆಕ ಜಾಗೃತೆ ಮನ್ಪುವ,ಕಿನ್ನಿ ದೀನಗ ಕಣ್ಣ್ ಬುಲವಂದಿನ ಕಿನ್ನಿಲು ಕೆಂಪು ಕೆಂಪು ಮಾಸದ ಮುದ್ದೆದ ಲೆಕ ತೋರುವ, ಕಣ್ಣ್ ಬುಲಯೆರೇನಗ ಮೈತ ರಂಗ್ಲಾ ಕಪ್ಪು,ತೌಡು,ಬೊಣ್ಯ ಇಂಚ ಬರ್ಪುಂಡು,ಅಪ್ರೂಪಗೊಂಜಿ ಬೊಲ್ದು ರಂಗ್ದ ಕಿನ್ನಿಲುಲಾ ಉಪ್ಪುವ, ಬೊಕ ಬೊಲ್ದುದ,ಕಪ್ಪುದ ಎಲಿಕ್ಲೆನ ಜಾತಿಲಾ ಉಂಡು.ಕಿಚ್ಚೆಲಿ,ಸೊಂಡೆಲಿ,ಎಲಿ,ಮಲ್ಲಾಂಡ ಪೆರ್ಗುಡೆಪನ್ಪ . ದುಂಬು ಕಾಡ ಬರಿಟ್ ಇತ್ತಿನ ಕುಲು ಮಲ್ಲ ಮಲ್ಲ ಪೆರ್ಗುಡೆನ್ ಪತ್ತ್ದ್ ಮಾಸ ಮಂತ್ ತಿನೊಂದಿತ್ತೆರ್ಗೆ.ಎಲಿ ಬಾರಿ ಚುರ್ಕುದ ಪ್ರಾಣಿ,ಅಯಿತ ಕೆಬಿ ಬಾರೀ ಸೂಗ್ರ.
ಎಲಿ ನಮ್ಮ ಧಾರ್ಮಿಕ ನಂಬಿಕೆಡ್ಲಾ ಜಾಗೆ ಪಡೆಯೊಂದುಂಡು.ಸುರೂತ ಪೂಜೆ ಕೈಕೊನುನ ಬಾಮಕುಮಾರೆ ಎಲಿತ ಬೆರಿಯೇರ್ದ್ ಚೌತಿದಾನಿ ಊರು ಸಂಚಾರ ಮನ್ಪುನೀಂದ್ ನಂಬೊಲಿಕೆ ಉಂಡು.ಅಂಚಾದಾ ದಾನ್ನ ಕೆಲವೆರ್ ಉದ್ದ ಮುಸುಂಟುದ ಸೊಂಡಿಲಿ ಜಾತಿದ ಎಲಿನ್ ಕೆರ್ಪುಜೆರ್.ಎಲಿಕ್ಲೆಗೇ ತೆನಸ್ ದೀಪುನ ಪರಕೆ ಇತ್ತಿನ ದೇವಸ್ಥಾನ ನಮ್ಮ ದೇಶೊಡು ಓಲಾ ಉಂಡುಗೆ.ಎಲಿತ ಒರುತ ಮಿಕ್ಕೀ ಮೌಸ್ ಪನ್ಪುನ ಜೋಕುಲೆ ಸಿನಿಮಾಲಾ ಉಂಡು.ತುಲು ಟು ಕೆಲವು ಗಾದೆಲುಲಾ ಎಲಿನ್ ಬಗೆಟ್ ಉಂಡು,'ಎಲಿಪೋಂಡ ಪಿಲಿಪೋಂಡು ಪನ್ಪೆರ್',ಊರುದಕ್ಲೆನ ಎದುರು ಪಿಲಿ ಬೊಡೆದಿನ ಎದುರು ಎಲಿ' ಇಂಚ.
ಎಪ್ರೀಲ್ 4 ಲೋಕ ಎಲಿಕ್ಲೆನ ದೀನಾಂದ್ ಲೋಕ ಪನೊಡಾಂಡ ಎಲಿಕ್ಲೆನ ಬಗ್ಗೆ ನಮ ತೆರಿದಿನ ದಾಲ ಇಜ್ಜಿ ಪಂಡ್ದ್ ತೋಜುಂಡು.ಎಲಿಕ್ಲೆರ್ದ್ ಪಸಂತ್ರೊಗಾಪುನ ಎಡ್ಡೆನ್ ತೆರಿಯೊನುಗ.ಎಲಿಕ್ಲೆನ್ಲಾ ಬದ್ಕೆರೆ ಬುಡ್ಕ.
