ಕೋಟಾ, ರಾಜಸ್ಥಾನ: ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (NTA) ಶುಕ್ರವಾರ ತಡರಾತ್ರಿ ದೇಶದ ಅತಿದೊಡ್ಡ ಎಂಜಿನಿಯರಿಂಗ್ ಪ್ರವೇಶ ಪರೀಕ್ಷೆಯಾದ ಜಂಟಿ ಪ್ರವೇಶ ಪರೀಕ್ಷೆಯ ಮುಖ್ಯ (ಜೆಇಇ ಮುಖ್ಯ 2025) ಫಲಿತಾಂಶ ಬಿಡುಗಡೆ ಮಾಡಿದೆ. ಜನವರಿ ಮತ್ತು ಏಪ್ರಿಲ್ನಲ್ಲಿ ಎರಡು ಅವಧಿಗಳಲ್ಲಿ ಈ ಪರೀಕ್ಷೆಯನ್ನು ನಡೆಸಲಾಗಿತ್ತು.
ಈ ಬಾರಿ 15,39,848 ವಿಶಿಷ್ಟ ಅಭ್ಯರ್ಥಿಗಳು ಪರೀಕ್ಷೆಗೆ ಅರ್ಜಿ ಸಲ್ಲಿಸಿದ್ದು, ಈ ಪೈಕಿ 14,75,103 ಮಂದಿ ಪರೀಕ್ಷೆ ಬರೆದಿದ್ದಾರೆ. ಅಲ್ಲದೆ, ಜೆಇಇ ಅಡ್ವಾನ್ಸ್ಡ್ 2025 ರ ಕಟ್-ಆಫ್ ಸಹ ಶುಕ್ರವಾರವೇ ಬಿಡುಗಡೆ ಮಾಡಲಾಗಿದೆ. ಇದರಲ್ಲಿ 2,50,236 ಅಭ್ಯರ್ಥಿಗಳು ಅಡ್ವಾನ್ಸ್ಡ್ ಗೆ ಅರ್ಹತೆ ಪಡೆದುಕೊಂಡಿದ್ದಾರೆ. ರಾಷ್ಟ್ರೀಯ ಪರೀಕ್ಷಾ ಏಜೆನ್ಸಿಯು ಅಧಿಕೃತ ವೆಬ್ಸೈಟ್ನಲ್ಲಿ ಏಪ್ರಿಲ್ ಅಧಿವೇಶನದ ಅಂತಿಮ ಕೀ ಆನ್ಸರ್ ಸಹ ಅಪ್ಲೋಡ್ ಮಾಡಿದೆ. ಅಭ್ಯರ್ಥಿಗಳು https://jeemain.nta.nic.in ಗೆ ಭೇಟಿ ನೀಡುವ ಮೂಲಕ ತಮ್ಮ ತಮ್ಮ ಫಲಿತಾಂಶಗಳನ್ನು ಮತ್ತು ಎರಡೂ ಅವಧಿಗಳ ಸಂಯೋಜಿತ ಶೇಕಡಾವಾರು ಸ್ಕೋರ್ ಪರಿಶೀಲಿಸಬಹುದು.
ರಾಜಸ್ಥಾನದಿಂದ ಗರಿಷ್ಠ ಟಾಪರ್ಗಳು: 100 ಪರ್ಸೆಂಟ್ ಗಳಿಸಿದ 24 ಅಭ್ಯರ್ಥಿಗಳಲ್ಲಿ ಗರಿಷ್ಠ 7 ಅಭ್ಯರ್ಥಿಗಳು ರಾಜಸ್ಥಾನದವರಾಗಿದ್ದಾರೆ. ಕೋಟಾ ಕೋಚಿಂಗ್ ಹಬ್, ರಾಜಸ್ಥಾನದಲ್ಲಿ ಟಾಪರ್ಗಳ ಸಂಖ್ಯೆಯನ್ನು ಹೆಚ್ಚಿಸುವಲ್ಲಿ ದೊಡ್ಡ ಕೊಡುಗೆ ನೀಡಿದೆ ಎಂದು ಶಿಕ್ಷಣ ತಜ್ಞ ದೇವ್ ಶರ್ಮಾ ಅಭಿಪ್ರಾಯಪಟ್ಟಿದ್ದಾರೆ. ರಾಜಸ್ಥಾನದ ನಂತರ ಮಹಾರಾಷ್ಟ್ರ, ಉತ್ತರ ಪ್ರದೇಶ ಮತ್ತು ತೆಲಂಗಾಣದಿಂದ ತಲಾ ಮೂವರು ಟಾಪರ್ಗಳಿದ್ದಾರೆ. ದೆಹಲಿ, ಗುಜರಾತ್ ಮತ್ತು ಪಶ್ಚಿಮ ಬಂಗಾಳದಿಂದ ಇಬ್ಬರು ಟಾಪರ್ಗಳಾದರೆ ಕರ್ನಾಟಕ ಮತ್ತು ಆಂಧ್ರಪ್ರದೇಶದಿಂದ ತಲಾ ಒಬ್ಬರು ಟಾಪರ್ಗಳಾಗಿ ಹೊರಹೊಮ್ಮಿದ್ದಾರೆ.
9 ರಾಜ್ಯಗಳಿಂದ 24 ಟಾಪರ್ ಗಳು: ಎನ್ಟಿಎ ಕೂಡ ರಾಜ್ಯದ ಟಾಪರ್ಗಳ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಒಟ್ಟು 53 ಅಭ್ಯರ್ಥಿಗಳನ್ನು ರಾಜ್ಯ ಟಾಪರ್ ಎಂದು ಘೋಷಿಸಲಾಗಿದ್ದು, ಈ ಪೈಕಿ 24 ಅಭ್ಯರ್ಥಿಗಳನ್ನು 100ಕ್ಕೆ 100 ಅಂಕಗಳನ್ನು ಗಳಿಸಿದ ಟಾಪರ್ ಎಂದು ಪರಿಗಣಿಸಲಾಗಿದೆ. ಈ 24 ಟಾಪರ್ಗಳು 9 ರಾಜ್ಯಗಳಿಗೆ ಸೇರಿದವರಾಗಿದ್ದಾರೆ.
ಈ ರಾಜ್ಯಗಳಲ್ಲಿ ಇಲ್ಲ ಯಾರೂ ಟಾಪರ್: ಅಂಡಮಾನ್ ನಿಕೋಬಾರ್, ಬಿಹಾರ, ಕೇರಳ, ಮಧ್ಯಪ್ರದೇಶ, ತಮಿಳುನಾಡು ಮುಂತಾದ 28 ರಾಜ್ಯಗಳು
ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಂದ ಯಾವುದೇ ರಾಜ್ಯ ಟಾಪರ್ ಆಗಿ ಹೊರಹೊಮ್ಮಿಲ್ಲ. ಭಾರತದ ಹೊರಗೆ ಪರೀಕ್ಷೆಗೆ ಹಾಜರಾದ ಅಭ್ಯರ್ಥಿಗಳಲ್ಲಿ ಕೂಡಾ ಯಾರೂ ಟಾಪರ್ ಆಗಿ ಹೊರ ಹೊಮ್ಮಲು ಸಾಧ್ಯವಾಗಿಲ್ಲ ಎಂದು ಖಾಸಗಿ ಕೋಚಿಂಗ್ ಸಂಸ್ಥೆಯ ವೃತ್ತಿ ಕೌನ್ಸೆಲಿಂಗ್ ತಜ್ಞ ಅಮಿತ್ ಅಹುಜಾ ಹೇಳಿದ್ದಾರೆ.
ಮಹಿಳಾ ಅಭ್ಯರ್ಥಿಗಳಿಂದ ಅಮೋಘ ಸಾಧನೆ: 100 ಪರ್ಸೆಂಟ್ ಅಂಕ ಗಳಿಸಿದವರಲ್ಲಿ ಇಬ್ಬರು ವಿದ್ಯಾರ್ಥಿನಿಯರಿದ್ದಾರೆ. ಪಶ್ಚಿಮ ಬಂಗಾಳದ ದೇವದತ್ತ ಮಾಝಿ ಮತ್ತು ಆಂಧ್ರಪ್ರದೇಶದ ಸಾಯಿ ಮನೋಗ್ನಾ ಗುತ್ತಿಕೊಂಡ 100ಕ್ಕೆ ನೂರು ಅಂಕ ಪಡೆದು ಟಾಪರ್ ಆದ ಮಹಿಳಾ ಅಭ್ಯರ್ಥಿಗಳು. ವರ್ಗವಾರು ನೋಡುವುದಾದರೆ, ಸಾಮಾನ್ಯ ವರ್ಗದಿಂದ 21 ಟಾಪರ್ಗಳಿದ್ದರೆ, ಒಬಿಸಿ, ಇಡಬ್ಲ್ಯೂಎಸ್ ಮತ್ತು ಎಸ್ಸಿ ವರ್ಗಗಳಿಂದ ತಲಾ 1, ಮಹಿಳಾ ವಿಭಾಗದ ಇಬ್ಬರು ವಿದ್ಯಾರ್ಥಿಗಳು ಶೇಕಡಾ 100ರಷ್ಟು ಅಂಕ ಗಳಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಇವರು ನೂರಕ್ಕೆ 100 ಅಂಕ ಗಳಿಸಿದ ಟಾಪರ್ಗಳು
1. ರಾಜಸ್ಥಾನ: ಓಂ ಪ್ರಕಾಶ್ ಬೆಹೆರಾ, ಸಕ್ಷಮ್ ಜಿಂದಾಲ್, ಅರ್ನವ್ ಸಿಂಗ್, ರಜಿತ್ ಗುಪ್ತಾ, ಮೊಹಮ್ಮದ್ ಅನಾಸ್, ಲಕ್ಷ್ಯ ಶರ್ಮಾ
2. ಆಂಧ್ರಪ್ರದೇಶ: ಸಾಯಿ ಮನೋಜ್ಞ ಗುತ್ತಿಕೊಂಡ
3. ದೆಹಲಿ: ದಕ್ಷ್, ಹರ್ಷ್ ಝಾ
4. ಗುಜರಾತ್: ಶಿವೇನ್ ವಿಕಾಸ್ ತೋಷ್ನಿವಾಲ್, ಅದಿತ್ ಪ್ರಕಾಶ್ ಬಾಗ್ಡೆ
5. ಕರ್ನಾಟಕ: ಕುಶಾಗ್ರ ಗುಪ್ತ
6. ಮಹಾರಾಷ್ಟ್ರ: ಆಯುಷ್ ರವಿ ಚೌಧರಿ, ಸಾನಿಧ್ಯ ಸರಾಫ್, ವಿಷಾದ್ ಜೈನ್
7. ತೆಲಂಗಾಣ: ವಂಗಲಾ ಅಜಯ್ ರೆಡ್ಡಿ, ಬಾನಿ ಬ್ರತಾ ಮಾಝಿ, ಹರ್ಷ್ ಎ ಗುಪ್ತಾ
8. ಉತ್ತರ ಪ್ರದೇಶ: ಶ್ರೇಯಾ ಲೋಹಿಯಾ, ಕುಶಾಗ್ರಾ ಬಂಗಹಾ, ಸೌರಭ್
9. ಪಶ್ಚಿಮ ಬಂಗಾಳ: ದೇವದತ್ತ ಮಾಂಝಿ, ಆರ್ಕಿಸ್ಮನ್ ನಂದಿ
