ರಾತ್ರೆನೇ ಅಂಚ, ಅವು ಗರ್ಗಂಡ ಕರ್ಗತ್ತಲೆ ಗುಮೆಲುನ ಪೊರ್ತು. ಅವೆತ ಕತ್ತಲೆ ಪನ್ಪುನವೇ ಬುಡ್ಪಾಯೆರಾವಂದಿನ ಒಂಜಿ ಗುಟ್ಟು. ನಾಡಿನಾತ್ ಇಕ್ಕಟ್ಟ್. ಒಕ್ಕಿನಾತ್ ಉತ್ತರೊ ತಿಕ್ಕಂದಿ ಎದ್ರ್ಕತೆ ಅವು. ಬೊಲ್ಪು ಕಣ್ಣೆದುರುದೆನ್ ತೂಪಿನರ್ಥೊಡು ತೋಜಾಂಡ, ಕತ್ತಲೆ ಪನ್ಪುನವು ಒವೆನ್ಲಾ ಕಣ್ಣ್ಗ್ ತೋಜಾವಂದೆ ಕಲ್ಪನಾ ಮಾತ್ರೊಡು ಸಾರ ಅರ್ಥೊಡು ಮನಸ್ಗೆತ್ತಾವುಂಡು. ಅಂಚಾದ್ ಪಗೆಲ್ರ್ದ್ ಇರ್ಲ್ದ ವೇಳ್ಯೊನೇ ದಿಂಜ ಗೂಢಕುತೂಹಲೊದಾಂದ್ ಪನೊಲಿ.
ನಮಡ ರಾತ್ರೆಡ್ದೇ ಪುದರ್ ಪಡೆಯಿನ ರಡ್ಡ್ ಪರ್ಬೊಲುಲ್ಲ. ಒಂಜಿ ಇಸರ ದೇಬೆರೆನ 'ಶಿವರಾತ್ರೆ' ಆಂಡ ನನೊಂಜಿ ಲೋಕದಪ್ಪೆ ದೈಯಾರ್ನ 'ನವರಾತ್ರೆ'. 'ನವರಾತ್ರಿ' ಸಂಸ್ಕೃತೊದ ಸವುದೊ. ಪುದರೇ ಪನ್ಪುನ ಲೆಕ ಅವು ಒರುಂಬ ರಾತ್ರೆದ ಪರ್ಬೊ. 'ನವ' ಪನ್ಪುನೆಕ್ 'ಪೊಸತ್ತ್' ಪಂದ್ಲಾ ಅರ್ಥೊ ಉಂಡು. ಅವು ಬಚ್ಚಿನ ಉಡಲ್ಗ್ ಪೊಸ ಪೊಲ್ಸುದ ಜೂವೊಕಲೆ ಕೊರ್ಪುನ ರಾತ್ರೆಲಾ ಅಂದ್.
ಈ ನವರಾತ್ರೆಡ್ಲಾ 'ಚೈತ್ರ ನವರಾತ್ರಿ' ಬೊಕ್ಕ 'ಶರನ್ನವರಾತ್ರಿ' ಪಂದ್ ರಡ್ಡ್ ಬಗೆಕುಲುಲ್ಲಗೆ. ಚಾಂದ್ರಮಾನೊದ ಚೈತ್ರ ಋತುತ ನವರಾತ್ರೆನ್ ಬಡಕಾಯಿ ಭಾರತೊಡು ಕೆಲವೆರ್ ಆಚರಿಪುನಲಾ ಉಂಡು. ಮಾನಿ ಬಯಕುನ ಮಾಯಂದ ಸಿದ್ಧಿಲೆನ್ ಕೈಪುಂಡಿ ಮಲ್ತ್ಂದ್ ಬಿರ್ದ್ ಸಾದಗೊ ಮಲ್ಪೆರೆ ಬಾರೀ ಎಡ್ಡೆ ಪೊರ್ತುಗೆ. ಅಂಚಾದ್ ಸಿದ್ಧ ಯೋಗಿಲು, ಮಂತ್ರೊವಿದ್ಯೆದಕುಲು ಈ ಪರ್ಬೊಗು ಮಾರಿಮಸಣ, ಮಲೆಗುಡ್ಡೆ, ಕಾಡ್ಂದ್ ದೆಂಗ್ದ್ ದೇವೀ ಪೂಜನೆ ಮಲ್ಪುವೆರ್. ಆಂಡ ನಮ್ಮವುಲು 'ನಾಡಪರ್ಬೊ' ಆದ್ ಪುಗರ್ತೆ ಪಡೆತಿನಿ ನನೊಂಜಿ ನವರಾತ್ರಿ. ಅವು ಆಜಿ ಋತುಕ್ಲೆಡ್ 'ಶರತ್' ಪನ್ಪುನ ಋತುಟು ಬರ್ಪುಂಡು. ಅಂಚಾದೇ ಅವೆನ್ 'ಶರತ್ + ನವರಾತ್ರಿ' ಪಂಡ 'ಶರನ್ನವರಾತ್ರಿ' ಪಂದ್ ಲೆಪ್ಪುವೆರ್.
ಮೂಜಿ ಮೂರ್ತಿಲೆನ ಮೈಬೊಲ್ಪುಡು ಉದಿಯ ಬೆಂದಿನ ಮಾಯಾ ದೆಯ್ಯಾರ್ ಒರ್ತಿ ಒರುಂಬ ರಾತ್ರೆ ಒರುಂಬ ಒರುಟು ಲೋಕೊಡು ಅಧರ್ಮೊನೇರಾದ್ ಮರ್ಲಾಟಿಗೆ ಗೊಬ್ಬೊಂದಿತ್ತಿನ ದೂರ್ತೆರೆನ ಬಿದೆನ್ ಮುತ್ತಾಯಿನ ದಿನಕುಲೇ ಈ ನವರಾತ್ರಿ. ಉಂದೆನ್ ಬಡಕಾಯಿಡ್ ದಸರಾ ನಂದೇ ಲೆಪ್ಪುವೆರ್. ದಸರಾ ಪನ್ಪುನವು 'ದಶಹರಾ' ಪನ್ಪಿನ ಸವುದೊಡ್ದು ಬೈದ್ಂಡ್. ದಶಹರಾ ಪಂಡ ದೇವಿ ಪತ್ತ್ ರಕ್ಕಸೆರೆನ್ ಕಾದ್ದ್ ಸೋಪಾದ್ ಕೆರಿನ ರಾತ್ರೆ ಪಂದಾಂಪುಂಡು. ಈ ಒಂರ್ಬ ದೇವಿನ ರೂಪುಲು ಒಂಜೊಂಜಿ ಗ್ರಂತೊಲೆಡ್ ಒಂಜೊಂಜಿ ನಮೂನೆಡ್ ಪಟ್ಟಿ ಮಲ್ತ್ದೆರ್. ಈ ಒಂರ್ಬೊ ರೂಪುಲಾ ಸಾಮಾನ್ಯ ಪೊಣ್ಣೊರ್ತಿನ ಬದ್ಕ್ದ ಬುಳೆಚ್ಚಿಲ್ಡುಪ್ಪುನ ಒಂಜೊಂಜೇ ಪಜ್ಜೆ ಲೆಕ ತೋಜುಂಡು.
ಮಾಭಾರತೊದ ಕತೆಟ್ ಬರ್ಪುನ ಪಾಂಡವೆರ್ ಧರ್ಮೊ ತತ್ತಿನ ಕೌರವೆರೆನ್ ಸೋಪಾದ್ ರಾಜ್ಯೊಪಾಲ್ನ್ ಗೆಂದಿನ ದಿನೊಲಾ ಈ ನವರಾತ್ರಿಗೆ. ಪಾಂಡವೆರೈವೆರ್ ವಿರಾಟೊನಗರೊಡು ಏಸ ಬದಲ್ಪೊಡಾದ್ ಬನ್ನಾಗ ಅಕುಲಕುಲೆನ ಆಯುಧೊಲೆನ್ ಶಮೀ ಮರೊಟು ಕಟ್ಟ್ದೀದ್ ಪೂಜಿತಿನೆರ್ದಾವರ ಈ ಪರ್ಬೊದ ಅಕೇರಿದ ದಿನೊಕ್ಲೆಡ್ ಆಯುಧ ಪೂಜೆ, ಶಮೀಪೂಜೆಲುಲಾ ನಡಪುವ. ರಾಮಾಯಣೊದ ಕತೆತ ಸಿರಿರಾಮೆ ದೇಬೆರ್ ಲಂಕೆದರಸು ಪತ್ತ್ತರೆ ರಾವಣೆನ್ ಪಗರಿ ನಾಟಾದ್ ಮಣ್ಣಮೂರಿಗೆತ್ತಾಯಿನಿಲಾ ಉಂದುವೇ ಪರ್ಬೊದ ಅಕೇರಿದಾನಿ. ಪತ್ತನೇ ದಿನೊತ ವಿಜಯ ದಶಮಿ ದೇವಿನ ಗೆಲ್ಮೆನೊದ ದಿನೊ ಮಾತ್ರ ಅತ್ತ್. ರಾವಣನನ್ನು ರಾಮೆ ಗೆಂದಿನ ದಿನೊಲಾ ಅಂದ್. ದಸರಾ ಪನ್ಪುನೆತ ಪಿರವು ಈ ದಶ (ಪತ್ತ್) ತರೆತಾಯೆನ್ ಕೆರಿನ (ಹರ) ಕತೆಲಾ ಉಂಡುಂದು ನಮ ತೆರಿಯೊನೊಡು.
ಭಾರತೊದ ಒವ್ವೇ ಪರ್ಬೊ ಉಪ್ಪಡ್, ಅವು ನಮ್ಮ ತುಳುನಾಡ್ದ ಜಾಲ್ಗೆತ್ತ್ನಗ ನಮ್ಮನೇ ಆಯಿನ ರೂಪುಗು ಬದಲ್ಪುಂಡು. ಆ ಪರ್ಬೊದ ಕತೆ, ಪಿನ್ನೆಲೆ, ಕಟ್ಟ್ ಕಟ್ಟಲೆಲತ್ತಾಂದೆ ಪುದರ್ಲುಲಾ ಏತೋ ಸಲ ಬೇತೆನೇ ಆಪ. ಉಂದು ಓಲ್ಲಾ ತೂಯೆರೆ ತಿಕ್ಕಂದಿ ಇಸೇಸವಾಯಿನ ತುಳುವೆರೆನ ಲೋಕಂದ ದಿಟ್ಟಿಗ್ ಎಡ್ಡೆ ಉದರ್ಮೆ.
ಮಾರ್ನೆಮಿಲಾ ಉಂದೆರ್ದ್ ಪಿದಯತ್ತ್. ನವರಾತ್ರಿ ಪನ್ಪುನೆನ್ ಒಂರ್ಬ ರಾತ್ರೆದ ಪರ್ಬಾಂದ್ ತುಳುವೆರ್ ಲೆಪ್ಪಾಂದೆ ಅವೆನ್ ಮಾರ್ನೆಮೀಂದ್ ಪೊಸ ಪುದರ್ಡ್ ಲೈದಿನವು ಗುರ್ತ ಮಲ್ಪೊಡೇ ಆಯಿನ ಇಚಾರ. ನವರಾತ್ರೆದ ಒಂರ್ಬನೇ ದಿನ ಮಹಾನವಮಿ ಪಂದ್ ಉಂಡು. ಉಂದು ಮಾಲಯೊದ ಅಮಾಸೆ ಕರಿದ್ ಒಂರ್ಬನೇ ದಿನ. ನಿರ್ನಾಲೊದ ಪಾಡ್ಯಗ್ ಕಡೀರಾಪುನ ದಿನೊತ ಲೆಕ್ಕ ಆಡೆಗೆತ್ತ್ನಗ ಒಂರ್ಬನೇ ದಿನತ 'ನವಮಿ' ಪಂದಾಪುಂಡು. ಪ್ರತಿ ತಿಂಗೊಲುಡುಲಾ ನವಮಿ ಉಂಡು. ಕಿಟ್ಟ ದೇಬೆರೆಗ್ ಬುಡ್ನ ಚಂದ್ರಮಾನ ತಿಂಗೊಲ್ದ ಎನ್ಮನೇ ದಿನ 'ಅಟ್ಟೆಮಿ' ಪರ್ಬೊ ಆಪಿನ ಲೆಕ, ಆನೆಮೋನೆದಾರೆಗ್ ಬುಡ್ನ ನಾಲನೇ ದಿನ 'ಚೌತಿ' ಪರ್ಬೊ ಆಪುನ ಲೆಕ, ದೇವಿಗ್ ಬುಡ್ನ ಒಂರ್ಬ ದಿನೊಕುಲಾ ಇಸೇಸೊನೇ ಆದಿತ್ತ್ಂಡಲಾ ಒಂರ್ಬನೇ ದಿನ ಮಾತ್ರ 'ಮಹಾನವಮಿ' ಪಂದ್ ಪುದರ್ ಪೋತುಂಡು.
ಮಹಾ ಪಂಡ 'ಮಲ್ಲ',ನೇಲ್ಯ. ಅಪಾಂಡ ಉಂದು ಅಪ್ಪೆದೇವಿನ ಪುದರ್ದ ಮಲ್ಲ ನವಮಿ. ಬಾಕಿ ತಿಂಗೊಲ್ದ ನವಮಿಡ್ದ್ ಉಂದು ಇಸೇಸ. ಈ 'ಮಹಾನವಮಿ' ಪನ್ಪುನೈತ ತುಳು ರೂಪೊನೇ ಮಾರ್ನೆಮೀಂದ್ ಪನೋಲಿ. ಮಹಾನವಮಿ ನವರಾತ್ರೆದ ಅಕೇರಿದ ದಿನ ಆಂಡ ತುಳುವೆರೆನ 'ಮಾರ್ನೆಮಿ' ಪನ್ಪುನ ಪುದರ್ ನವರಾತ್ರೆದ ಮಾತಾ ದಿನೊಕುಲೆಗ್ಲಾ ಉಪ್ಪುನವು. ಅವು ಒಂಜಿ ದಿನೊಕು ಮಾತ್ರ ಸೀಮಿತ ಆಯಿನ ಪುದರತ್ತ್.
ತುಳುನಾಡ್ಡ್ ನವರಾತ್ರೆಡ್ ಮಾಲಯ ಅಮಾಸೆದ ಮನದಾನಿ ನಿರ್ನಾಲೊದ ಪಾಡ್ಯ. ಆನಿ ಪುಲ್ಯೊಗು ದೇವಲ್ಯೊಲೆಡ್ ಪೂಜೆ ಕರಿತ್ದ್ ಪತ್ತ್ಪತ್ತೇರಿ ಸೇರ್ದ್ ಒಪ್ಪತಪ್ಪ ಮದಿತ್ದ್ ಆನೆಪಾತ್ರೆ 'ಕೊಪ್ಪರಿಗೆ' ಏರಾವೆರ್. 'ಕೊಪ್ಪರಿಗೆ' ಪನ್ಪುನೆತ ಸಾದಾಸೀದಾ ಅರ್ಥೊ 'ನಿಧಿ' ಪಂದ್. ಆಂಡ ಮೂಲು ಮಾರ್ನೆಮಿ ಅಕೇರಿ ಮುಟ್ಟ ನಡಪುನ ನುಪ್ಪುಪುರ್ಸಾದೊದ ಸೇಬೆಗ್ ಬೋಡಾಯಿನ ಮಲ್ಲ ಕಟಾರೊನು 'ಕೊಪ್ಪರಿಗೆ' ಪಂದ್
ಲೈದೆರ್. ಅವು ಉಚ್ಚಯೊ ಕೋಡಿಯೆತ್ತುನ ಮುಟ್ಟ ಖಾಲೀಂದ್ ಆಯೆರಿಜ್ಜಿ. ನುಪ್ಪು ಪಟ್ಟುನ ಪುಣ್ಯಬೇಲೆ ನಡತೊಂದೇ ಉಪ್ಪೊಡು ಪನ್ಪಿನ ಉದ್ದೇಶೊ ಈ ಕೊಪ್ಪರಿಗೆ ಮೂರ್ತೊದ ಪಿರವುಂಡು.
ಕೆಲವು ಕಡೆಟ್ ಸುದ್ದ ಮುದ್ರಿಕೆದ 'ಕಲಸೊ' ಏರಾವುನಲಾ ಉಂಡು. ಅಕೇರಿದಾನಿ ಆ ಕಲಸೊನು ಜಾಪಾವುನಿ. ಚೌತಿಗ್, ನೋಂಪುಗು ಸಾನ - ಇಲ್ಲ್ ದಿಂಜಾವಂದಿನಕುಲು ಮಾರ್ನೆಮಿ ಕಡೀರ ದಿನೊಟು ಕುರಲ್ ಮೂರ್ತೊನ್ಲಾ ಮಲ್ಪುವೆರ್. ಪಾಡ್ಯೊದ ಮನದಾನಿ ಬಿದಿಗೆ, ಬೊಕ್ಕದಾನಿ ತದಿಗೆ. ನಾಲನೇ ದಿನ ದುರ್ಗಾ ಚತುರ್ಥಿ (ಚೌತಿ). ದೇವಿಗಾನಿ ಚೌತಿ ಬಲಸುನ ಸಂಪ್ರದಾಯ ಉಂಡು. ಐನನೆತಾನಿ 'ಲಲಿತೆ' ಪನ್ಪುನ ಒರುಟು ದೇವಿನ್ ಸುಗಿಪುನ ಲಲಿತಾ ಪಂಚಮಿ. ಆಜಿನೆತವು ದುರ್ಗಾ ಷಷ್ಠಿ, ಆನಿ ತುಳುನಾಡೊರ್ಮೆ ಬರವುದಪ್ಪೆ ಶಾರದೆನ್ ಮಣ್ಣ ಮೂರ್ತಿದೊರುಟು ಕುಲ್ಲಾದ್ ಪೂಪೂಜನೆ ಸುರು ಮಲ್ಪುವೆರ್. ಕಲ್ಪುಬಾಲೆಲೆಗ್ ಅರಿವಾಣೊದರಿಟ್ ಬರೆಪಾದ್ ಬರವುದ ಮೂರ್ತೊ ಮಲ್ಪುವೆರ್. ಬರವುದ ಕೊಟ್ಯ ಪಂಡ ಸಾಲೆ, ಬೂಕುದ ಕೊಟ್ಯ ಪಂಡ ಗ್ರಂತೊಲೆನ ಅದೆ ಇಂಚ ಸರಸೊತಿ ಕಲ್ಪೊಲುಪ್ಪುನ ಮಾತಾ ಕಡೆಟ್ಲಾ ಸಿರಿಶಾರದಾ ಪೂಜೆ ಕರಿಪುವೆರ್.
ಏಳನೆತಾನಿ ದುರ್ಗಾ ಸಪ್ತಮಿ. ದೇವಿ ಮಾಂಕಾಳಿನ ಒರುನು ಪಡೆದ್ ಉಗ್ರವಾಯಿನ ದಿನೊ. ಆನಿದ ಪೂಜೆಗ್ ಕೆಲವು ಸಾನೊಲೆಡ್ ಮಾನಿಚ್ಚಿಲ್ ಮಲ್ಪಾವೆರ್. ಇಸೇಸ ಪೂಜೆ, ಉಚ್ಚಯೊಲು ಉಪ್ಪುಂಡು. ಇಲ್ಲ್ಲೆಡ್ಲಾ ಏಳನೇ ಪೂಜೆ ಕರಿಪುನಕುಲುಲ್ಲೇರ್. ಮಾರ್ನೆಮಿದ ಒರುಂಬ ಪೂಜೆ ಕರಿಪೆರಾವಂದಿನಕುಲು ಇಜ್ಜಾ ಆ ಕಟ್ಟ್ ಪತ್ತಾಂದಿನಕುಲು ಅಕೇರಿದ ಮೂಜಿ ಪೂಜೆನ್ ಮಾತ್ರ ಕರಿಪುನ ಕಿರಮೊ ಉಂಡು. ಆ ಮೂಜಿ ಪೂಜೆಲು ಈ ಏಳನೇ ದಿನತಾನಿ ಸುರುವಾಪುಂಡು.
ಎಣ್ಮನೇ ದಿನೊಕು ದುರ್ಗಾಷ್ಟಮಿ. ಈ ದಿನ ಕೆಲವು ಸಿದ್ಧಿ ಸಾಧನೆಲೆಗ್ ಬಾರೀ ಎಡ್ಡೆಗೆ. ಒರುಂಬನೇ ದಿನೊನೇ ಮಹಾನವಮಿ. ಆನಿ ಪಾಂಡವೆರ್ನ ಕತೆತ ಪಿನ್ನೆಲೆಡ್ ಆಯುಧಪೂಜೆ, ವಾಹನ ಪೂಜೆ ಮಲ್ಪುವೆರ್. ಕರ್ಬೊದ ಬೇಲೆ ಮಲ್ಪುನಕುಲು, ಕರ್ಬೊದ ಸರಕ್ಲೆನ್ ಗಳಸುನಕುಲು ಆನಿದ ದಿನ ಬೇಲೆದ ಕೊಟ್ಯನ್ ಅಡಿತ್ಪೂಜಿದ್ ದೆಕ್ಕ್ಪತ್ತ್ದ್ ಸಜ್ಜ್ ಮಲ್ಪುವೆರ್. ವರ್ಸ ಇಡೀಕ ನಮನ ದುನ್ನೊನು ತುಂಬುದು ಬಲಿಪುನ ವಾಹನೊಲೆನ್ ಆನಿದ ದಿನ ಇಲ್ಲಬಾಲೆಲೆಕ ಪೊರ್ಲುಕಂಟ್ಡ್ ಮೀಪಾವೆರ್. ಗಂಧೊ ಪೂಜಿದ್, ಪೂಮಾಲೆನೇರಾದ್, ದೂಪೊ ಪತ್ತ್ದ್, ಬೊಲ್ಪು ತೋಜಾದ್ ಮಾನಾವೆರ್. ಮಲ್ತಿನ ವರ್ಸೊದ ಚಾಕಿರಿಗ್ ಸೊಲ್ಮೆಂದ್ ಗೌರೊವೊನುಲಾ, ನನ ದುಂಬುದ ಒತ್ತುಗಾರಿಕೆಗ್ ನಿಯತ್ತ್ದ ಜಬುದಾರಿನಲಾ ಆನಿ ನೆಂಪು ಮಲ್ತ್ ಕೊರ್ಪೆರ್.
ಮನದಾನಿ ಒಂರ್ಬೊ ದಿನೊತ ಮಾರ್ನೆಮಿ ಕರಿದ್ ವಿಜಯ ದಶಮಿದ ದಿನೊ. ಅವು ಒರುಂಬ ರಕ್ಕಸೆರೆನ್ ಸೋಪಾದ್ ಅಪ್ಪೆ ದೆಯ್ಯಾರ್ ತನ್ನ ಗೆಲ್ಪುನು ತೋಜಾಯಿನ ದಿನ. ಜಗೊದಪ್ಪೆ ನರಮಾನ್ಯಧರ್ಮೊಗೇ ಅಧಿದೇವತೆ ಆತಿನಾಳ್. ಅಂಚಾದ್ ಆಳೆನ ಗೆಲ್ಕಾಯಿ ಪನ್ಪುನವು ಧರ್ಮೊಗು ತಿಕ್ಕಿನ ಗೆಲ್ಮೆನ. ಲೋಕೊಡು ಅನ್ಯಾಯೊ ದಿಂಜಿನಗ ಆ ಪುದೆನ್ ಜಾಪಾದ್ ಧರ್ಮೊನೀತಿದ ಅರ್ಸಂದ ಕೊಡಿನ್ ಊರ್ಯೆರೆ ಪ್ರಕೃತಿ ಪನ್ಪುನವೇ ಪೊಣ್ಣ ಒರುಟು ಸಾರ್ಪತ್ತಿಯಾತಿನ ಒರುಂಬದಿನೊತ ಸಿರಿಗತೆ ವಿಜಯ ದಶಮಿಯಾನಗ ಮುಗಿತಲೊಗೆತ್ತುಂಡು.
ಆನಿಯೇ ವಿದ್ಯಾದಶಮಿ ಪನ್ಪುನ ಸಂಕಲ್ಪೊಲಾ ಉಂಡು. ಅಂಚಾದ್ ಸರಸೊತಿ ಪೂಜೆ ಕರಿತ್ದ್ ಬರವುಗೊಂಜಿ ಚಾಲನೆ ಕೊರ್ಪುನ, ಬೂಕುಗ್ರಂತೊಲೆಗ್ ತುಡರ್ ತೋಜಾದ್ ಪುಡ್ಯೊನುನ ಕಟ್ಟ್ಲಾ ಆನಿ ಕೆಲವೆರ್ ಮಲ್ಪುವೆರ್. ಮೈಸೂರುಡು ಆನೆಮಿತ್ತ್ ಸಿಂಗರ್ಪುದ ಬಂಗಾರ ಮಂಟಮೆನೇರಾದ್ ಅಪ್ಪೆ ಚೌಂಡಿಗ್ ಆನೆಬಲಿ ನಡಪಿಲೆಕೋನೇ ತುಳುನಾಡ್ಡ್ ಆತ್ ನೆಟ್ಟ ಪೂಜಿತಿನ ಶಾರದಮ್ಮನ ಮಣ್ಣ್ದೊರುನು ಬೊಳ್ಯದುತ್ತೈತ, ಬೊಳ್ಳಿಬೀಣೆ, ಮುಕ್ಕೆಮಲ್ಲಿಗೆದ ತೆರೆಜಲ್ಲಿಡ್ ಐತ ಮಲ್ತ್ದ್ ನೆರೊಣಿಗೆ ಕರೀತ್ದ್ ನೀರ್ಗಾವಾಸ ಮಲ್ಪುನ ಗೌಜಿ ನಡಪುಂಡು. ಒರುಂಬ ಪೂಜೆ ಕರಿತಿನ ದೇವಿನ ದೇವಲ್ಯೊಲೆಡ್ ದಸಮಿದಾನಿ ತೇರ್ ಒಯ್ಪುವೆರ್. ಈ ಏಳ್ಯೊಡು ಪರಕೆಗೆಂದ್ ಪಂಡಿನಕುಲು, ಕೊಸಿಕ್ಂದ್ ಗೆರೆಪುನಕುಲು ಪಿಲಿ ಏಸ ಪಾಡ್ದ್ ರಂಗ್ದ ಸೇಬೆನ್ ಸಂದಾವೆರ್. ಕೆಲವು ಸಾನೊಲೆಡ್ ದೈವೊಲೆಗ್ ಮಾರ್ನೆಮಿದ ದೂಪದೀಪ, ಮಾನಿಚ್ಚಿಲ್ , ಬಲಿಭೋಗ ಆವಾರ ಪತ್ತಂದ ದಶಮಿದಾನಿ ಸಂದಾವುನ ಸಂಪ್ರದಾಯ ಉಂಡು. ಕೋರಿಕುರಿ ಕಡ್ತ್ದ್ ರಕ್ಕಸೆರೆನ್ ತಜತ್ಕೆರ್ನ ಉರಿಗೋಪೊದ ದೇವಿಗಾವಾರ ಕೊರ್ಪೆರ್. ಸಂಪುಸಾಂತಿ ಮಲ್ಪುವೆರ್.
ಪ್ರತಿಯೊಂಜಿ ಪರ್ಬೊಲಾ ಕರಿನ ನೆಂಪೊಂಜೆಕ್ ಇನಿ ಪೊಸಅರ್ಥೊನೊಂಜೆನ್ ನಾಡುನ ಅವಕಾಶೊ. ಧೂರ್ತಬುದ್ಧಿ ಕಳೆದ್ ಬಾಳುವೆ ಸಾರ್ಥಕಾಪಿ ತರೊಟು ಪರ್ಬೊಲು ಜಗತ್ತ್ಗ್ ಬೊಲ್ಪಾಪುನ ಕಣ್ಣಾದುಂಡು. ನಮ್ಮ ಉಲಯಿಡುಪ್ಪುನ ಪೊಣ್ಮೆದ ಕಡೆಕೊಂಜಿ ದಿಟ್ಟಿ ಪಾರಾಯೆರೆ, ಆ ಮುಖೇನ ಲೋಕೊದ ಪೊಣ್ಣುಪೊಂಜೊವುಲೆನ ಬಗೆಟ್ ಎಡ್ಡೆ ಮಾನೊದ ಕಾಳಜಿ ದೀಯೆರೆ ಈ ಪರ್ಬೊ ಪೊಲಬಾದುಂಡು.
ಮಾರ್ನೆಮಿ ಶಾಸ್ತ್ರಪೂಜೆಲಾ ಅಂದ್, ಶಸ್ತ್ರಪೂಜೆಲಾ ಅಂದ್. ಅವು ಉಳಯಿದುಡಲ್ದ ಗೇನ, ಪಿದಯಿಮೈತ ಸಾಮರ್ತಿಗೆ ರಡ್ಡೆನ್ಲಾ ಕುಡ್ತು ಲಕ್ಕಾವುಂಡು. ಪಾಡ್ಯ ಪನ್ಪುನೆರ್ದ್ ಸುರುವಾದ್ ಒರುಂಬ ಬಗೆತ ರಕ್ಕಸಬುದ್ಧಿಲೆನ್ ಸುಡುಸೂಕರ ಮಲ್ತ್ದ್ ಅಕೇರಿಗ್ ಧರ್ಮೊನೇ ಕಡೆವಿಜಯೊನು ಗೆಂದೊಡು ಪನ್ಪುನ ಉಳತಿರ್ಲ್ ಈ ಪತ್ತ್ ದಿನೊತ ಪರ್ಬೊಡುಂಡು. ಅಂಚಿತ್ತಿ ಮಾರ್ನೆಮಿದ ಗಡ್ದ್ ಮಿನದನೊಲು ಲೋಕೊದೆಡ್ಡೆಪುಗು ಸಾದಿಯಾವಡ್ಂದ್ ಉಡಲರ್ತಿಡ್ ಬಾಮ್ಯೊನುಗ..
ಬರಹ : ಡಾ. ಅರುಣ್ ಉಳ್ಳಾಲ್
arunullal725@gmail.com
