ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಖಾತೆ ಸಚಿವ ನಿತಿನ್ ಗಡ್ಕರಿ ಅವರು ಫಾಸ್ಟ್ಟ್ಯಾಗ್ ವಾರ್ಷಿಕ ಪಾಸ್ ಅನಾವರಣಗೊಳಿಸಿದ್ದಾರೆ. ಆಗಸ್ಟ್ 15ರಿಂದ ವಾಹನ ಚಾಲಕರು ಈ ಪಾಸ್ ಅನ್ನು 3,000 ರೂ.ಗಳಿಗೆ ಖರೀದಿಸಬಹುದು. ಈ ಕ್ರಮವು ಸಂಚಾರ ದಟ್ಟಣೆ ಕಡಿಮೆ ಮಾಡುವುದು ಮತ್ತು ಒಂದೇ ವಹಿವಾಟಿನ ಮೂಲಕ ಸುಗಮ ಟೋಲ್ ಪಾವತಿಗಳನ್ನು ಅನುಮತಿಸಿ, ಹೆದ್ದಾರಿ ಪ್ರಯಾಣವನ್ನು ಹೆಚ್ಚಿಸುವ ಗುರಿ ಹೊಂದಿದೆ.
ಫಾಸ್ಟ್ಟ್ಯಾಗ್ ವಾರ್ಷಿಕ ಪಾಸ್ ಅನ್ನು ಭಾರತದಾದ್ಯಂತ ಒಂದು ವರ್ಷದವರೆಗೆ ಯಾವುದೇ ಅಡೆತಡೆಯಿಲ್ಲದ ಹೆದ್ದಾರಿ ಪ್ರಯಾಣ ನೀಡುವಂತೆ ವಿನ್ಯಾಸಗೊಳಿಸಲಾಗಿದೆ. ಆಗಸ್ಟ್ 15ರಿಂದ ಜಾರಿಗೆ ಬರಲಿದೆ. ಸಕ್ರಿಯಗೊಳಿಸಿದ ದಿನಾಂಕದಿಂದ ಒಂದು ವರ್ಷದವರೆಗೆ ಅಥವಾ 200 ಟ್ರಿಪ್ಗಳವರೆಗೆ ಮಾನ್ಯವಾಗಿರುತ್ತದೆ. ಪಾಸ್ ನಿರ್ದಿಷ್ಟವಾಗಿ ಕಾರುಗಳು, ಜೀಪ್ಗಳು ಮತ್ತು ವ್ಯಾನ್ಗಳಂತಹ ವಾಣಿಜ್ಯೇತರ ಖಾಸಗಿ ವಾಹನಗಳಿಗೆ ಮಾತ್ರ ಎಂಬುದು ಗಮನಾರ್ಹ.
FASTag ವಾರ್ಷಿಕ ಪಾಸ್ ಆ್ಯಕ್ಟಿವೇಟ್ ಮಾಡುವುದು ಹೇಗೆ?: FASTag ವಾರ್ಷಿಕ ಪಾಸ್ ಅನ್ನು ಸಕ್ರಿಯಗೊಳಿಸಲು ಬಳಕೆದಾರರು ರಾಜ್ಮಾರ್ಗ್ ಯಾತ್ರಾ ಅಪ್ಲಿಕೇಶನ್, NHAI ಮತ್ತು MoRTHನ ಅಧಿಕೃತ ವೆಬ್ಸೈಟ್ಗಳಲ್ಲಿ ಲಭ್ಯವಿರುವ ಮೀಸಲಾದ ಲಿಂಕ್ ಅನ್ನು ಕ್ಲಿಕ್ ಮಾಡಬೇಕು. ಈ ಲಿಂಕ್ ಪಾಸ್ ಆ್ಯಕ್ಟಿವೇಷನ್ ಮತ್ತು ಅಪ್ಡೇಟ್ ಪ್ರಕ್ರಿಯೆಗಳನ್ನು ಸುಗಮಗೊಳಿಸುತ್ತದೆ. ಟೋಲ್ ಪಾವತಿಗಳನ್ನು ಕೈಗೆಟುಕುವ ವಹಿವಾಟಾಗಿ ಸರಳಗೊಳಿಸುವ ಮೂಲಕ 60 ಕಿ.ಮೀ ವ್ಯಾಪ್ತಿಯೊಳಗಿನ ಟೋಲ್ ಪ್ಲಾಜಾಗಳ ಬಗ್ಗೆ ಇರುವ ಕಳವಳಗಳನ್ನು ಈ ಕ್ರಮ ಪರಿಹರಿಸುತ್ತದೆ.
ಹೊಸ ನೀತಿಯ ಪ್ರಯೋಜನಗಳು: ಇದು ಹೆದ್ದಾರಿ ಬಳಕೆಗಾಗಿ ಎರಡು ಪಾವತಿ ಮಾದರಿಗಳನ್ನು ಪರಿಚಯಿಸುತ್ತದೆ. ಮೊದಲ ಮಾದರಿಯು ವರ್ಷಕ್ಕೆ ರೂ. 3,000 ವೆಚ್ಚದ ವಾರ್ಷಿಕ ಪಾಸ್ ಆಗಿದ್ದು, ಟೋಲ್ ರಸ್ತೆಗಳಿಗೆ ಅನಿಯಮಿತ ಪ್ರವೇಶ ಒದಗಿಸುತ್ತದೆ. ಎರಡನೇ ಮಾದರಿಯು 100 ಕಿಲೋಮೀಟರ್ ಪ್ರಯಾಣಕ್ಕೆ ರೂ. 50 ಶುಲ್ಕ ವಿಧಿಸುತ್ತದೆ.
ಹೆದ್ದಾರಿಗಳನ್ನು ಕಡಿಮೆ ಬಾರಿ ಬಳಸುವವರಿಗೆ ಇದು ಸೂಕ್ತ.
ವಾಹನಗಳು ಚಲನೆಯಲ್ಲಿರುವಾಗ ಟೋಲ್ ಪಾವತಿಗಳನ್ನು ಸುಗಮಗೊಳಿಸಲು ಫಾಸ್ಟ್ಟ್ಯಾಗ್ ರೇಡಿಯೋ ಫ್ರೀಕ್ವೆನ್ಸಿ ಐಡೆಂಟಿಫಿಕೇಶನ್ (RFID) ತಂತ್ರಜ್ಞಾನವನ್ನು ಬಳಸುತ್ತದೆ. ಸಾಧನವನ್ನು ವಾಹನದ ವಿಂಡ್ಸ್ಕ್ರೀನ್ನಲ್ಲಿ ಸ್ಟಿಕ್ಕರ್ನಂತೆ ಇರಿಸಲಾಗುತ್ತದೆ. ವಾಹನಗಳು ಟೋಲ್ ಪ್ಲಾಜಾವನ್ನು ಸಮೀಪಿಸುತ್ತಿದ್ದಂತೆ RFID ಟ್ಯಾಗ್ ಲಿಂಕ್ ಮಾಡಲಾದ ಖಾತೆಯಿಂದ ನೇರ ಪಾವತಿಯನ್ನು ಅನುಮತಿಸುತ್ತದೆ.
FASTag ಕಡ್ಡಾಯ: ಜನವರಿ 1, 2021ರಿಂದ ಎಲ್ಲಾ ಫೋರ್ ವೀಲ್ಗಳು ಮತ್ತು ಅದಕ್ಕಿಂತ ಹೆಚ್ಚಿನ ವಾಹನಗಳು FASTag ಹೊಂದಿರಬೇಕು. ಅದನ್ನು ಹೊಂದಿರದ ವಾಹನಗಳು ದುಪ್ಪಟ್ಟು ಟೋಲ್ ತೆರಿಗೆ ಪಾವತಿಸಬೇಕಾಗುತ್ತದೆ. ಪ್ರಸ್ತುತ FASTag ಎಲ್ಲಾ ರಾಷ್ಟ್ರೀಯ ಹೆದ್ದಾರಿಗಳು ಮತ್ತು 100ಕ್ಕೂ ಹೆಚ್ಚು ರಾಜ್ಯ ಹೆದ್ದಾರಿ ಟೋಲ್ ಪ್ಲಾಜಾಗಳು ಸೇರಿದಂತೆ ದೇಶಾದ್ಯಂತ 700ಕ್ಕೂ ಹೆಚ್ಚು ಟೋಲ್ ಪ್ಲಾಜಾಗಳಲ್ಲಿ ಕಾರ್ಯನಿರ್ವಹಿಸುತ್ತದೆ.
ದೇಶದಲ್ಲಿ ಎಷ್ಟು NHAI ಟೋಲ್ ಪ್ಲಾಜಾಗಳಿವೆ?: ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ (NHAI) ಟೋಲ್ ಮಾಹಿತಿ ವ್ಯವಸ್ಥೆಯ ದಾಖಲೆಗಳ ಪ್ರಕಾರ, ಕಾಶ್ಮೀರದಿಂದ ಕನ್ಯಾಕುಮಾರಿಯವರೆಗೆ ದೇಶದಲ್ಲಿ ಒಟ್ಟು 1057 NHAI ಟೋಲ್ ಪ್ಲಾಜಾಗಳಿವೆ. ಇದರರ್ಥ ನಿಮ್ಮ 3000 ರೂ. ಪಾಸ್ ಈ ಎಲ್ಲಾ ಟೋಲ್ ಪ್ಲಾಜಾಗಳಲ್ಲೂ ಕಾರ್ಯನಿರ್ವಹಿಸುತ್ತದೆ. ಇವುಗಳಲ್ಲಿ, ಸುಮಾರು 78 ಟೋಲ್ ಪ್ಲಾಜಾಗಳು ಆಂಧ್ರ ಪ್ರದೇಶದಲ್ಲಿವೆ. ಬಿಹಾರದಲ್ಲಿ 33 ರಾಷ್ಟ್ರೀಯ ಹೆದ್ದಾರಿ ಟೋಲ್ ಪ್ಲಾಜಾಗಳಿದ್ದರೆ, ಯುಪಿಯಲ್ಲಿ 123 ಟೋಲ್ ಪ್ಲಾಜಾಗಳಿವೆ.
