ಆಗೋಸ್ಟ್ 7 ಕೈ ಮಗ್ಗದ ದಿನ ಪನ್ನಗ ಎಂಕ್ ಎನ್ನ ಜೋಕುಲಾಟಿಗೆದ ದಿನಕುಲು ನೆಂಪುಗು ಬತ್ತ್ಂಡ್.ಅಪಗ ಎಂಕುಲು ಬಿಜೈ ಕಾಪಿಕಾಡ್ ಡ್ ಇತ್ತ, ಇಲ್ಲ ಕೈತಲ್ ಒಂತೆ ದೂರೊಡು ಯಾಪಲಾ ಟಕ ಟಕ ಶಬ್ದ ಕೇನೊಂದು ಇತ್ತ್ಂಡ್.ಎಂಕುಲು ಅವು ದಾದ ಟಕ ಟಕ ಕೇನುನೀಂದ್ ಅಮ್ಮಡ ಕೇನ್ಂಡ ಆರ್ ಅವು ಮಗ್ಗದ ಕೊಟ್ಯ,ಮಗ್ಗ ನೈಪುನ ಸ್ವರೊಕೇನುನೀಂದ್ ಪನೊಂದಿತ್ತೆರ್.
ಒಂಜಿ ದಿನ ಶಾಲೆ ಬುಡ್ದು ಬತ್ತಿನ ಯಾನ್ ಅಣ್ಣನಕ್ಲೆನ ಒಟ್ಟಿಗೆ ಸೇರೊಂದು ಮಗ್ಗದ ಕೊಟ್ಯ ತೂಯೆರೆ ಪೋಯ. ಅವುಲು ಉಲಾಯಿ ಪೋಯೆರೆ ಧೈರ ಇಜ್ಜಂದೆ ಕಂಡಿಡೆನೇ ನಿಲ್ಕ್ ತೂತಿನಿ.ಎಬ್ಬಾ !!! ಮಲ್ಲ ಮಗ್ಗ!!! ಮರಟೇ ಮಂತಿದಿನ ಅಯಿಟ್ ಒಂಜಾತ್ ನೂಲು ಜತ್ತೊಂದುಂಡು,ಎದುರು ಒಂಜಿ ಅಪ್ಪೆ ಕುಲೊಂದು ಕೈ ಟ್ ನೂಲುದ ಕಟ್ಟನ್ ಅಂಚಿರ್ದ್ ಇಂಚಿ,ಇಂಚಿರ್ದ್ ಅಂಚಿ ದಕ್ಕೊಂದು ಕಾರ್ಡ್ ಮಿತ್ತ್ ತಿರ್ತ್ ದೊಂಕೊಂದು ಕುಂಟುಮನ್ಪುನೆನ್ ಆಚಿರದ ಕಣ್ಣ್ಡ್ ತೂಯಿನ ಇತ್ತೆಲಾ ನೆಂಪು ಉಂಡು.
ಅಂದ್ ಮಗ್ಗ ನೈಪುನಲಾ ಒಂಜಿ ಕಾಲೊಡು ಒಂಜಿ ಸಮಾಜದ ಕುಲಕಸುಬಾದ್ ಇತ್ತ್ಂಡ್. ಚರಕಡ್ ಪರ್ತಿದ ನೂಲು ಮಂತ್ದ್ ಅಯಿನ್ ರಂಗ್ಡ್ ಪಾಡ್ದ್ ಬೈಪಾದ್,ಬೊಕ್ಕ ನುಂಗಾದ್,ಆ ನೂಲುನು ರೀಲ್ ಮಂತ್ದ್ ಅಯಿನ್ ಮಗ್ಗಡ್ ಪಾಡ್ದ್ ಕುಂಟು ಮನ್ಪುನಆತ್ ಸುಲಭದ ಬೇಲೆ ದಾಲ ಅತ್ತ್. ಕಠಿಣ ಪರಿಶ್ರಮ ಬೊಕ ಶ್ರದ್ದೆ ಈ ಬೇಲೆ ಡ್ ಅಗತ್ಯೊ. ಈ ಮಗ್ಗದ ಬೇಲೆಗ್ ಸರಿಯಾಯಿನ ಪ್ರತಿಫಲ ತಿಕ್ಕೂಂದು ನಿಗಾಂಟ್ಲಾ ಇಜ್ಜಿ.ಒಂಜಿ ಕಾಲೊಡು ಅಯಿನೇ ನಂಬುದಿತ್ತಿನ ಜನಕ್ಲೆನ ಬದ್ಕ್ ಬಾರೀ ಬಂಙ ಆದಿತ್ತ್ಂಡ್.
ನರಮಾನಿನ ಮಾನ ಮದೆಪೆರೆ ಕುಂಟುನು ನಾಡ್ ಪತ್ತಿನ ಕುಲು ನೇಕಾರೆರ್ ಪನ್ಪುನವು ಸತ್ಯ.ಅಕ್ಲೆನ ಈ ಕಜ್ಜೊಗು ಉಡಲೊರ್ಮೆದ ಎಡ್ಡೆಪ್ಪುಲು ಇನಿತ ದಿನ ಸಂದಾವೊಡು.ನಮ್ಮ ದೇಶೊಡು ತನ್ನಾಲ್ಮೆದ ಪೊರುಂಬಾಟ ನಡತೊಂದುಪ್ಪುನಗ ಪರದೇಶಿಲು ಕನತಿನ ಕುಂಟುದ ಮಿಷನುಲು ನಮ್ಮ ಕೈ ಮಗ್ಗದ ಕುಂಟುದ ನಾಶೊಗು ಸಾದಿ ಆಪುಂಡೂಂದು ತೆರಿದ್ ಗಾಂಧಿಜಿಯೆರ್ ಚರಕಡ್ ನೂಲು ದೆತ್ತ್ಂದ್ ಮಗ್ಗದ ಕುಂಟೇ ನಮ ತುತ್ತೊಡು ಪರದೇಶೊದ ಕುಂಟುನು ಗಲಸೆರೆ ಬಲ್ಲೀಂದ್ ಮಲ್ಲ
ಆಂದೊಲನನೇ ಮಂತೆರ್.ನಡು ಬೀದಿಡ್ ಪರದೇಶದ ಕುಂಟುನು ಪೊತ್ತಾವುನಲಾ ಮಂತ್ದೆರ್.ಇಂಚಿತ್ತಿ ನಮ್ಮ ದೇಶದ ಪೆರ್ಮೆದ ಕೈಮಗ್ಗನ್ ನಮ ಮರಪೆರೆ ಬಲ್ಲಿ.
ಮಗ್ಗದ ಕುಂಟು ತುತ್ತುಂಡ ನಮ್ಮ ಜೂವಗ್ ಇತ.ಅವು ಚಳಿಕ್ ಬೆಪ್ಪು,ಸೆಕೆಕ್ ಸಂಪು ಕೊರ್ಪುಂಡು. ಆರೋಗ್ಯಗ್ ಎಡ್ಡೆ.ಇತ್ತೆ ಬೈದಿನ ನೈಲಾನ್,ಪೊಲಿಸ್ಟರ್ ಕುಂಟುಲು ಪೊರ್ಲುಗು ಆವೇ ಅತ್ತಂದೆ ಎಡ್ಡೆಗ್ ಅತ್ತ್. ಇತ್ತೆಂದು ಕುಂಟುಲು ಪ್ಲಾಸ್ಟಿಕ್ಗ್ ಸಮ ಪಂಡ ತಪ್ಪಾವಂದ್,ಸೂ ಪತ್ತ್ಂಡ ಗಲಿಗೆದುಲಯಿ ಪೊತ್ತುದು ನಾಶ ಮನ್ಪುನ ಪೊಲಿಸ್ಟರ್ ಕುಂಟುಲು.ಯಾಪ ಕರೆಂಟ್ಡ್ ನಡಪುನ ಮಗ್ಗದ ಮಿಷನುಲು ಬತ್ತ್ಂಡಾ ಕೈ ಮಗ್ಗಗ್ ಪೆಟ್ಟ್ ಬೂರುಂಡು.ತಿಂಗೊಲು ಕಟ್ಲೆ ಆಪುನ ಬೇಲೆ ಅಯಿಟ್ ರಾತ್ರೆ ಪುಲ್ಯಾನಗ ಆದ್ ಮುಗಿಂಡ್. ಬೇತೆ ಬೇತೆ ನೈಲನ್ ನೂಲುಲಾ ಅಯಿಕಾದ್ ಬತ್ತ್ಂಡ್, ಕಮ್ಮಿ ಬಿಲೆಕ್ ಕುಂಟು ತಿಕ್ಕುನ ಕಾಲ ಬನ್ನಗ.ಪರ್ತಿದ ನೂಲುದ ಕುಂಟು ದೆತೊನುನಕುಲು ಕಮ್ಮಿ ಆಯೆರ್.ಪರ್ತಿದ ಬೆನ್ನಿ ಬೆನ್ಪುನಕುಲುಲಾ ಕಮ್ಮಿ ಆನಗ ಮಗ್ಗ ಮೂಲೆ ಸೇರ್ಂಡ್.ಒಂಜಿ ಕಾಲೊಡು ನಮ್ಮ ದೇಶದ ಪೆರ್ಮೆ ಆದಿತ್ತಿನ ಕೈ ಮಗ್ಗನ್ ಒರಿಪೊಡು,ಆಯಿತ ಬಿಲೆ,ನಿಲೆ ಒರಿಯೊಡು ಪನ್ಪುನ ದಿಟ್ಟಿ ಡ್ ನಮ್ಮ ಸರಕಾರ ಆಗೋಸ್ಟ್ 7 ನ್ ಕೈ ಮಗ್ಗದ ದಿನಾಂದ್ ನಿಗಾಂಟ್ ಮಂತ್ದ್ಂಡ್.ಈ ದಿನ ನಮ ಕೈ ಮಗ್ಗನ್ ನೆಂತ್ಂಡ ಯಾರಂದ್ ನಮ್ಮ ಜೂವಗ್ ಎಡ್ಡೆ,ದಿಂಜ ಬಾಲ್ತರ ಬರ್ಪುನಂಚಿನ ಕೈ ಮಗ್ಗದ ಕುಂಟುನು ದೆತೊನುಗ,ಕೈ ಮಗ್ಗದ ಬೆನ್ಕೆನ್ ಒರಿಪುಗ.ಪತ್ತ್ ಸಾರ,ಇರ್ವ ಸಾರದ ಸೀರೆ ದೆಪ್ಪುನಕುಲು ಎಲ್ನೂದು,ಎನ್ಮನೂದೆತ ಮಗ್ಗದಲಾ ಸೀರೆ ದೆಪ್ಪುಗ,ನಾಲ್ ಸರ್ತಿ ತುತ್ತುದು ಕಬಾಟ್ಡ್ ದೀಪುನೆರ್ದ್ ಪರಿನೇಟ ತುತ್ತುದು,ಪರೀಂಡಲಾ ಗಲಸೆರೇಪುನ ಮಗ್ಗದ ನೂಲುದ ಕುಂಟುಲೆನ್ ದೆತೊನೊಡು ಪನ್ಪುನನೇ ಈ ಬರವುದ ಆಸೆ.ಸೊಲ್ಮೆಲು.
