ಪೆರುವಾಯಿ (ವಿಟ್ಲ): ದಕ್ಷಿಣ ಕನ್ನಡ ಜಿಲ್ಲೆಯ ಗಡಿಭಾಗ ಪೆರುವಾಯಿಯ ಎರಡು ಸೇತುವೆಗಳು ಜನರ ಪಾಲಿಗೆ “ಸಾವಿನ ಹಾದಿ”ಯಾಗಿವೆ. ತಡೆಗೋಡೆ ಇಲ್ಲದ, ತುಕ್ಕು ಹಿಡಿದ ಕಬ್ಬಿಣ ಹೊರಚಾಚಿದ ಈ ಸೇತುವೆಗಳಿಂದ ಕೇವಲ 10 ದಿನಗಳಲ್ಲಿ ಒಂದು ಪಿಕಪ್ ಮತ್ತು ಕಾರು ನದಿಗೆ ಉರುಳಿವೆ. ಐವರು ಪ್ರಯಾಣಿಕರು ಕೂದಲೆಳೆಯ ಅಂತರದಲ್ಲಿ ಪಾರಾಗಿದ್ದಾರೆ.
ಯಾವ ಸೇತುವೆಗಳು ಅಪಾಯದಲ್ಲಿವೆ?
1. ಪೆರುವಾಯಿ-ಮಾಣಿಲ ಸೇತುವೆ: ಅತೀ ಕಿರಿದು. ಇಳಿಜಾರಿನಿಂದ ನೇರ ಸೇತುವೆ ಪ್ರವೇಶ. ಎದುರಿನಿಂದ ವಾಹನ ಬಂದರೆ ಪಾಸ್ ಆಗಲು ಜಾಗವೇ ಇಲ್ಲ.
2. ಪೆರುವಾಯಿ-ಬಳ್ಳೂರು-ಕೇರಳ ಸಂಪರ್ಕ ಸೇತುವೆ: ಇದು ಅತ್ಯಂತ ಅಪಾಯಕಾರಿ. ಎರಡೂ ಬದಿ ತಡೆಗೋಡೆ ಇಲ್ಲ. ತಿರುವಿನ ಬಳಿಕ ಏಕಾಏಕಿ ಸೇತುವೆ ಎದುರಾಗುತ್ತದೆ. ರಾತ್ರಿ ಹೊತ್ತಿನಲ್ಲಿ ರಸ್ತೆಯೇ ಮುಂದುವರೆದಂತೆ ಭಾಸವಾಗಿ ಚಾಲಕರು ನೇರವಾಗಿ ನದಿಗೆ ಇಳಿಯುತ್ತಿದ್ದಾರೆ.
“ಅವೈಜ್ಞಾನಿಕ ವಿನ್ಯಾಸವೇ ಅಪಘಾತಕ್ಕೆ ಕಾರಣ”
ಸ್ಥಳೀಯ ವಾಹನ ಚಾಲಕ ರಮೇಶ್ ಹೇಳುವಂತೆ, “ತಿರುವು ಮುಗಿದ ತಕ್ಷಣ ಸೇತುವೆ ಬರುತ್ತೆ. ಹೊಸಬರಿಗೆ ಗೊತ್ತೇ ಆಗಲ್ಲ. ಬ್ರೇಕ್ ಹಾಕುವಷ್ಟರಲ್ಲಿ ವಾಹನ ನಿಯಂತ್ರಣ ತಪ್ಪುತ್ತೆ. ರಾತ್ರಿ ಆದರೆ ಮುಗೀತು ಕಥೆ.”
ಶಿಕ್ಷಣ-ಆರೋಗ್ಯಕ್ಕೆ ತೊಡಕು
ಈ ಮಾರ್ಗದಲ್ಲಿ ದಿನಕ್ಕೆ 300ಕ್ಕೂ ಹೆಚ್ಚು ವಾಹನ ಸಂಚರಿಸುತ್ತವೆ. ಮಾಣಿಲ, ವಿಟ್ಲ, ಪುತ್ತೂರು ಶಾಲಾ-ಕಾಲೇಜುಗಳಿಗೆ ಹೋಗುವ ವಿದ್ಯಾರ್ಥಿಗಳು, ಕೇರಳಕ್ಕೆ ತೆರಳುವ ರೋಗಿಗಳು
ಇದೇ ಸೇತುವೆ ಅವಲಂಬಿಸಿದ್ದಾರೆ. “ಮಕ್ಕಳನ್ನು ಶಾಲೆಗೆ ಕಳುಹಿಸೋಕು ಭಯ” ಎನ್ನುತ್ತಾರೆ ಪೋಷಕರು.
ಕೆಂಪು ಕಲ್ಲಿನ ತೇಪೆಗೆ ಗ್ರಾಮಸ್ಥರ ಕೆಂಡ
ಹಲವು ಬಾರಿ ಮನವಿ ಕೊಟ್ಟರೂ ಲೋಕೋಪಯೋಗಿ ಇಲಾಖೆ ಕ್ಯಾರೆ ಎಂದಿಲ್ಲ. ಬದಲಾಗಿ ಕಳೆದ ವಾರ ಒಂದು ಲೋಡ್ ಕೆಂಪು ಕಲ್ಲು ತಂದು ಸೇತುವೆ ಬದಿಗೆ ಸುರಿದು ಹೋಗಿದ್ದಾರೆ. “ಇದು ಜನರ ಕಣ್ಣಿಗೆ ಮಣ್ಣೆರಚುವ ಕೆಲಸ. ನಮ್ಮ ಜೀವಕ್ಕೆ ಬೆಲೆ ಇಲ್ವಾ?” ಎಂದು ಯುವಕ ಸಂಘದ ಅಧ್ಯಕ್ಷ ಪ್ರಶ್ನಿಸಿದ್ದಾರೆ.
ಗ್ರಾಮಸ್ಥರ ಆಗ್ರಹವೇನು?
1. ತಕ್ಷಣ ತಾತ್ಕಾಲಿಕ ತಡೆಗೋಡೆ, ಪ್ರತಿಫಲಕ ಸೂಚನಾ ಫಲಕ ಅಳವಡಿಸಬೇಕು.
2. ರಾತ್ರಿ ಗೋಚರಿಸುವಂತೆ ಸೋಲಾರ್ ಬೀದಿದೀಪ ಹಾಕಬೇಕು.
3. 2026-27ನೇ ಸಾಲಿನಲ್ಲಿ ಎರಡೂ ಕಡೆ ಹೊಸ RCC ಸೇತುವೆಗೆ ಅನುದಾನ ಮೀಸಲಿಡಬೇಕು.
ಹಲವು ಬೇಡಿಕೆಗಳನ್ನು ಮುಂದಿಟ್ಟು ನಾಳೆ ಪೆರುವಾಯಿ ಜಂಕ್ಷನ್ನಲ್ಲಿ ರಸ್ತೆ ತಡೆದು ಪ್ರತಿಭಟನೆಗೆ ನಾಗರಿಕ ಹೋರಾಟ ಸಮಿತಿ ಕರೆ ನೀಡಿದೆ.
