ಕುಡ್ಲ :ತುಲು ಪರಿಷತ್ ಬೊಕ ಮ್ಯಾಪ್ಸ್ ಕಾಲೇಜು ಕುಡ್ಲ ಮುಕ್ಲೆನ ಒತ್ತುಸೇರಿಗೆಡ್ ಲೇಖಕಿ ಶಾರದಾ ಅಂಚನ್ರೆನ 'ನಂಬಿ ಸತ್ತೊಲು 'ಬೊಕ 'ರಕ್ತ ಶುದ್ಧಿ-ಆರೋಗ್ಯ ವೃದ್ಧಿ ' ಅಂಚೆನೆ ಡಾ/ ಪ್ರಭಾಕರ ನೀರುಮಾರ್ಗ ಮೆರೆನ ಕಾಂದಬರಿ "ಓಲಗ' ಬುಡುಗಡೆ ದ ಲೇಸ್ ಬೊಕ ಬಿಸು ಪರ್ಬದ ಬಗೆಟ್ ಪಾತೆರಕತೆ ಕುಡ್ಲ ದ ಬಂಟ್ಸ್ ಹಾಸ್ಟೆಲ್ ದ ಮುಟ್ಟ ಇತ್ತಿನ ಮ್ಯಾಪ್ಸ್ ಕಾಲೇಜಿದ ಲೇಸ್ದ ಚಾವಡಿಡ್ ನಡತ್ತ್ಂಡ್.
ಈ ಲೇಸ್ಡ್ ಪುಗಾರ್ತೆದ ಬರವುದಾರಾಯಿನಿ ಡಿ.ಎಂ.ರೋಹಿಣಿ ಮಸ್ತಿರೆ ಬುಡುಗಡೆ ಮಂತ್ದ್ "ಈ ಇರ್ವೆರ್ ಲೆಖಕೆರ್ ವರ್ಷಗ್ ಒಂಜಿ,ರಡ್ಡ್ ಬೂಕುಲೆನ್ ಬುಡುಗಡೆ ಮನ್ಪುನವು ಆಚಿರ ಆಪುಂಡು.ಅಕ್ಲೆನ ಸಾಧನೆ ಮೆಚ್ಚೊಡಾಯಿನ" ಪಂಡೆರ್ , ತುಲು ಬರವುದಾರಾಯಿನ ಕುಶಲಾಕ್ಷಿ.ವಿ.ಕುಲಾಲ್ ಕಣ್ವತೀರ್ಥ ಬಿಸು ಪರ್ಬದ ಬಗೆಟ್,ಅಯಿತ ಆಚರಣೆ ಬೊಕ ಮಹತ್ವದ ಬಗೆಟ್ ಪಾತೆರ್ಯೆರ್. ನಮ ಸಜ್ಜನೆರೆ ಸಹವಾಸ ಮನ್ಪೊಡು,ಅಕುಲು ನಂಕ್ ಯಾಪಲಾ ಬೆರಿಸಾಯ ಆಪೆರ್ಂದ್ ಶಾರದಾ ಅಂಚನ್ ಪಂಡೆರ್.
ಮ್ಯಾಪ್ಸ್ ಕಾಲೇಜಿದ ಗುರ್ಕಾರ್ಲು ದಿನೇಶ್ ಆಳ್ವ ಪಾತೆರ್ದ್ ಬಿಸುತ ಬಗೆಟ್ ಜೋಕುಲೆಗ್ ತೆರಿಪಾದ್ ಕೊರ್ನೆಕ್ ಕುಶಲಾಕ್ಷಿ ಕುಲಾಲೆರೆನ್ ಅಭಿನಂದಿಸಾಯೆರ್. ಎಂ.ಆರ್.ಪಿ.ಎಲ್ ದ
ನಿವೃತ್ತ ಮಹಾ ಪ್ರಂಬಂಧಕೆರಾಯಿನ ವೀಣಾ ಶೆಟ್ಟಿ ಲೇಸ್ ದ ಗುರ್ಕರ್ಮೆದ ಮಣೆಟ್ ಕುಲ್ದು ಎಡ್ಡೆಪ್ಪುಲೆನ್ ಬಯಕಿಯೆರ್.ಕಲ್ಪಾರ್ಥಿಲು ಬರವು,ಬೇಲೆ,ಸಂಪಾದನೆನ್ ಮಾತ್ರ ತೂವಂದೆ ನಮ್ಮ ಸಂಸ್ಕೃತಿ ಬೊಕ ಆಚರಣೆದ ಕಡೆಕ್ಲಾ ಗುಮನ ಕೊರೊಡೂಂದು ಪಂಡೆರ್.
ಲೇಸ್ ಡ್ ಬಿನ್ನೆರಾದ್ ಚಂದ್ರಹಾಸ ಸುವರ್ಣ ,ತುಲು ಪರಿಷತ್ ದ ಕಾರ್ಯಂತೆರಾಯಿನ ಬೆನೆಟ್ ಅಮ್ಮಣ್ಣ, ಸಾಹಿತಿ ಡಿ.ಪ್ರಭಾಕರ ನೀರುಮಾರ್ಗ ಮಿತ್ತರ್ಮೆಡ್ ಇತ್ತೆರ್,ತುಳು ಪರಿಷತ್ ದ ಗುರ್ಕಾರ್ಲು ತಾರಾನಾಥ ಗಟ್ಟಿ ಕಾಪಿಕಾಡ್ ಲೇಸ್ ಸುದಾರಿಕೆ ಮಂತರ್, ಪರಿಷತ್ ದ ಪಣವುದ ಪಾಲವೆರಾಯಿನ ಶುಭೋದಯ ಆಳ್ವ ಎದ್ಕೊಂಡೆರ್.ಡಾ.ಪ್ರಭಾಕರ ನೀರುಮಾರ್ಗ ಬಿನ್ನೆರೆಗ್ ನೆಂಪುದ ಕಾಣಿಕೆ ಕೊರ್ಯೆರ್.
