ವಾಷಿಂಗ್ಟನ್: ಸ್ವಿಟ್ಜರ್ಲೆಂಡ್ನಲ್ಲಿ ನಡೆಯುತ್ತಿದ್ದ ಅತ್ಯಂತ ಸೂಕ್ಷ್ಮ ಶಾಂತಿ ಮಾತುಕತೆಯಿಂದ ಇರಾನ್ ದಿಢೀರ್ ಹೊರನಡೆದ ಬೆನ್ನಲ್ಲೇ ಜಾಗತಿಕ ಕಚ್ಚಾತೈಲ ಮಾರುಕಟ್ಟೆ ತಲ್ಲಣಗೊಂಡಿದೆ. ಬ್ರೆಂಟ್ ಕಚ್ಚಾತೈಲ ಬೆಲೆ ಪ್ರತಿ ಬ್ಯಾರೆಲ್ಗೆ 82.30 ಡಾಲರ್ಗೆ, WTI ತೈಲ 78 ಡಾಲರ್ಗೆ ಜಿಗಿದಿದ್ದು ಶೇ.2ರಷ್ಟು ಏರಿಕೆ ಕಂಡಿದೆ.
ಬೆಳವಣಿಗೆಗೆ ಕಾರಣವೇನು?
1. ಟ್ರಂಪ್ ಬೆದರಿಕೆ: ಸ್ವಿಟ್ಜರ್ಲೆಂಡ್ನ ಬರ್ಗೆನ್ಸ್ಟಾಕ್ನಲ್ಲಿ ಉಭಯ ದೇಶಗಳ ನಡುವೆ ಸಂಧಾನ ನಡೆಯುತ್ತಿದ್ದಾಗಲೇ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ “ಹೆಜ್ಬೊಲ್ಲಾ ದಾಳಿ ನಿಲ್ಲಿಸದಿದ್ದರೆ ಇರಾನ್ ಮೇಲೆ ಕಳೆದ ವಾರಕ್ಕಿಂತಲೂ ಭೀಕರ ದಾಳಿ ನಡೆಸುತ್ತೇವೆ” ಎಂದು ಸಾಮಾಜಿಕ ಮಾಧ್ಯಮದಲ್ಲಿ ಬಹಿರಂಗ ಎಚ್ಚರಿಕೆ ನೀಡಿದರು.
2. ಇಸ್ರೇಲ್ ದಾಳಿ: ಕದನ ವಿರಾಮ ಒಪ್ಪಂದವನ್ನು ಗಾಳಿಗೆ ತೂರಿ ಇಸ್ರೇಲ್ ದಕ್ಷಿಣ ಲೆಬನಾನ್ ಮೇಲೆ ವೈಮಾನಿಕ ದಾಳಿ ನಡೆಸಿ 32 ನಾಗರಿಕರನ್ನು ಬಲಿ ತೆಗೆದುಕೊಂಡಿತು.
3. ಇರಾನ್ ಪ್ರತಿಕ್ರಿಯೆ:ಇದನ್ನು “ವಿಶ್ವಾಸದ್ರೋಹ” ಎಂದು ಖಂಡಿಸಿದ ಇರಾನ್ ನಿಯೋಗ ತಕ್ಷಣ ಮಾತುಕತೆಯಿಂದ ಹೊರನಡೆಯಿತು. ಜೊತೆಗೆ ಇರಾನ್ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ ವಿಶ್ವದ ಶೇ.20 ತೈಲ ಸಾಗುವ ಹಾರ್ಮುಜ್ ಜಲಸಂಧಿಯನ್ನು ಸಂಪೂರ್ಣ ಬಂದ್ ಮಾಡುವುದಾಗಿ ಘೋಷಿಸಿದೆ.
ಮಾರುಕಟ್ಟೆ ಮೇಲೆ ಪರಿಣಾಮ
14px;">ಕಳೆದ ವಾರ 60 ದಿನಗಳ ಕದನ ವಿರಾಮ ಒಪ್ಪಂದದ ಬಳಿಕ ತೈಲ ದರ 73 ಡಾಲರ್ಗೆ ಇಳಿದು ನಿರಾಳ ಮೂಡಿತ್ತು. ಆದರೆ ಈಗಿನ ರಾಜತಾಂತ್ರಿಕ ಬಿಕ್ಕಟ್ಟಿನಿಂದ ಹೂಡಿಕೆದಾರರಲ್ಲಿ ಆತಂಕ ಮನೆ ಮಾಡಿದೆ. ಹಾರ್ಮುಜ್ ಜಲಸಂಧಿ ಬಂದ್ ಆದರೆ ಜಾಗತಿಕ ತೈಲ ಪೂರೈಕೆಯ ಐದನೇ ಒಂದು ಭಾಗಕ್ಕೆ ಕತ್ತರಿ ಬೀಳಲಿದೆ.
ಇರಾನ್ ಖಡಕ್ ಎಚ್ಚರಿಕೆ
ಇರಾನ್ ಮುಖ್ಯ ಸಂಧಾನಕಾರ ಮೊಹಮ್ಮದ್ ಬಾಗೇರ್ ಗಲಿಬಾಫ್ ಪ್ರತಿಕ್ರಿಯಿಸಿ, “ಅಮೆರಿಕ ತನ್ನ ಭಾಷೆ ಮೇಲೆ ನಿಗಾ ಇಡಲಿ. ನಮ್ಮ ಸಶಸ್ತ್ರ ಪಡೆಗಳು ಯಾವುದೇ ಬೆದರಿಕೆಗೆ ತಕ್ಕ ಉತ್ತರ ನೀಡಲು ಸಿದ್ಧ” ಎಂದಿದ್ದಾರೆ.
ಮಧ್ಯಸ್ಥಿಕೆ ವಹಿಸಿದ್ದ ಪಾಕಿಸ್ತಾನ ಮತ್ತು ಕತಾರ್ ಒಪ್ಪಂದ ಉಳಿಸಲು ತೆರೆಮರೆಯಲ್ಲಿ ತೀವ್ರ ಪ್ರಯತ್ನ ನಡೆಸಿವೆ. ಸ್ವಿಟ್ಜರ್ಲೆಂಡ್ ಮಾತುಕತೆಯ ಮುಂದಿನ ನಡೆ ಜಾಗತಿಕ ಆರ್ಥಿಕತೆ ಮತ್ತು ಇಂಧನ ಬೆಲೆಯ ದಿಕ್ಕನ್ನು ನಿರ್ಧರಿಸಲಿದೆ.
