ಬಂಟ್ವಾಳ : ಹುಟ್ಟುಹಬ್ಬದ ಸಂಭ್ರಮಕ್ಕೆ ಕ್ರೀಡಾ ಸಡಗರದ ಮೆರುಗು! ಕಳ್ಳಿಗೆ ಗ್ರಾಮದ ಕನಪಾಡಿ ನಿವಾಸಿ ಅಕೇಶ್ ಹಾಗೂ ಸುಜಾತ ದಂಪತಿಗಳ ಪುತ್ರಿ ದಿಯಾ ಅವರ 10ನೇ ವರ್ಷದ ಹುಟ್ಟುಹಬ್ಬದ ವಿಶೇಷ ಸಂದರ್ಭದಲ್ಲಿ ಡ್ರೀಮ್ 11ಕಳ್ಳಿಗೆ ತಂಡದ ನೂತನ ಜೆರ್ಸಿ ಬಿಡುಗಡೆ ಸಮಾರಂಭವು ಸಂಭ್ರಮದಿಂದ ಅದ್ದೂರಿಯಾಗಿ ನಡೆಯಿತು.
ಕಾರ್ಯಕ್ರಮದ ಮುಖ್ಯ ಅತಿಥಿಗಳಾದ ರೊನಾಲ್ಡ್ ಡಿಸೋಜಾ ಹಾಗೂ ಓಮಯಾ ಬೆದ್ರಾಡಿ ಅವರು ತಂಡದ ನೂತನ ಜೆರ್ಸಿಗಳನ್ನು ಅನಾವರಣಗೊಳಿಸುವ ಮೂಲಕ ಆಟಗಾರರ ಸಂಭ್ರಮವನ್ನು ಇಮ್ಮಡಿಗೊಳಿಸಿದರು.
ತಂಡದ ಆಟಗಾರರಾದ ಪ್ರಾಶ್ವಿ, ದಿಯಾ, ದರ್ಶನ್, ಶ್ರೀಜನ್, ಪ್ರೀತ್ ಲೆರಾಯ್, ಆಯುಷ್, ಅರುಷ್, ನಿಖಿಲ್ ಹಾಗೂ ಯಶ್ಮಿತ್ ಅವರ ಹೆಸರುಗಳಿರುವ ಆಕರ್ಷಕ ಜೆರ್ಸಿಗಳನ್ನು ಈ ಸಂದರ್ಭದಲ್ಲಿ ಪರಿಚಯಿಸಲಾಯಿತು. ತಂಡದ ಕೋಚ್ ಪ್ರವೀಣ್ ಲೋಬೊ ಅವರ ಜೆರ್ಸಿಯನ್ನೂ ಬಿಡುಗಡೆಗೊಳಿಸಲಾಯಿತು.
ಪ್ರತಿಯೊಬ್ಬ ಆಟಗಾರನ ಹೆಸರಿನೊಂದಿಗೆ ಸಿದ್ಧಗೊಂಡ ನೂತನ ಜೆರ್ಸಿಗಳು ತಂಡದ ಒಗ್ಗಟ್ಟು, ಕ್ರೀಡಾಸ್ಫೂರ್ತಿ ಹಾಗೂ ಹೊಸ ಉತ್ಸಾಹದ
ಸಂಕೇತವಾಗಿ ಗಮನ ಸೆಳೆದವು. ದಿಯಾ ಅವರ ಹುಟ್ಟುಹಬ್ಬದ ಸಂಭ್ರಮಕ್ಕೆ ಈ ವಿಶಿಷ್ಟ ಕಾರ್ಯಕ್ರಮ ಮತ್ತಷ್ಟು ಕಳೆ ತುಂಬಿತು.
ನಿಶಾ ಪೂಜಾರಿ ಕನಪಾಡಿ ಕಾರ್ಯಕ್ರಮ ನಿರೂಪಿಸಿದರು. ತಂಡದ ಕೋಚ್ ಪ್ರವೀಣ್ ಲೋಬೊ ಉಪಸ್ಥಿತರಿದ್ದರು. ಡ್ರೀಮ್‌ಝೋನ್ ಇವೆಂಟ್ಸ್ (Dreamzone Events) ಕಾರ್ಯಕ್ರಮವನ್ನು ಆಯೋಜಿಸಿತ್ತು. ಕಾರ್ಯಕ್ರಮದ ಯಶಸ್ಸಿಗೆ ಸಹಕರಿಸಿದ ಅಕೇಶ್ ಕನಪಾಡಿ ಹಾಗೂ ಸುಜಾತಾ ಅವರಿಗೆ ಕೃತಜ್ಞತೆ ಸಲ್ಲಿಸಲಾಯಿತು.
ಹೊಸ ಜೆರ್ಸಿಯೊಂದಿಗೆ ಹೊಸ ಹುರುಪು, ಹೊಸ ಉತ್ಸಾಹದೊಂದಿಗೆ ಕ್ರೀಡಾಂಗಣಕ್ಕಿಳಿಯಲಿರುವ ಡ್ರೀಮ್ 11 ಕಳ್ಳಿಗೆ ತಂಡದ ಎಲ್ಲಾ ಆಟಗಾರರು ಮುಂದಿನ ಕ್ರೀಡಾಕೂಟಗಳಲ್ಲಿ ಉತ್ತಮ ಸಾಧನೆ ಮಾಡಲಿ ಎಂದು ಶುಭ ಹಾರೈಸಲಾಯಿತು.
